Английн Ливерпүүл хотод 2025 оны 9-р сарын 4-нд эхэлсэн сонирхогчдын боксын Дэлхийн аварга шалгаруулах тэмцээн (ДАШТ)-ээс Францын эмэгтэй боксчид хасагджээ.
Энэ удаагийн тэмцээнд эмэгтэй тамирчдаас хүйс тогтоох шинжилгээ шаардлагатай байсан ч Францын Боксын Холбоо тамирчдынхаа шинжилгээг хугацаанд нь ирүүлж чадаагүй тул тус улсын таван эмэгтэй боксчин тэмцээнд оролцох эрхээ алджээ.
Францын боксчид ганцаараа ийм асуудалтай тулгарсангүй. Нигери, Фижи, Филиппин, Доминиканы Бүгд Найрамдах Улсын нийт долоон тамирчин мөн хүйс тогтоох шинжилгээний шаардлага хангаагүйгээс тэмцээнээс хасагдсан байна.
Дэлхийн Боксын Холбоо (World Boxing) энэ асуудалд тухайн улсуудын боксын холбоодыг буруутгажээ. Холбооны зүгээс хүйс тогтоох шинжилгээний хариуцлагыг улс бүр өөрсдөө хариуцна гэж тодорхой заасан боловч зарим холбоо хугацаандаа амжаагүй гэж мэдэгдсэн байна.
Шинжилгээнд оролцсон тамирчид тэнцээгүй эсэх талаар Дэлхийн Боксын Холбоо ямар нэгэн мэдээлэл өгөхөөс татгалзжээ.
