Цахим орчинд залилах гэмт хэрэг үйлдэж байсан 43 настай эмэгтэй “Т”-г 2025 оны 10-р сарын 12-ны өдөр Сонгинохайрхан дүүргийн нутаг дэвсгэрт баривчилсан талаар цагдаагийн байгууллагаас мэдээллээ.
Цахим залиланг зохион байгуулж байжээ
Мөрдөн шалгах ажиллагааны урьдчилсан дүнгээр сэжигтэн “Т” нь:
- Фэйсбүүкт хуурамч зарууд оруулах,
- Сугалаа нэрээр иргэдийг төөрөгдүүлэх,
- Телеграмм сувгаар “даалгавар гүйцэтгэх” нэрийн дор иргэдээс мөнгө залилан авах зэрэг үйлдлүүдийг удаа дараа хийсэн байж болзошгүй байна.
2.8 тэрбум төгрөгийн хохирол
Цагдаагийн байгууллагын мэдээлснээр, сэжигтэн нь өнгөрсөн нэг жилийн хугацаанд нийт 1,533 гүйлгээ хийж, иргэдэд нийлбэр дүнгээр 2.8 тэрбум төгрөгийн хохирол учруулсан болохыг урьдчилсан байдлаар тогтоожээ.
Одоогоор тус хэрэгт холбогдуулан мөрдөн шалгах ажиллагаа үргэлжилж байгаа бөгөөд холбогдох баримтуудыг нягталж, хохирсон иргэдийн тоог тодорхойлох ажлыг хийж байна.
