Гар утасны хэрэглээний нөлөө — шинэ төрлийн өвчин үүсгэж байна
Өнөөдөр бидний амьдрал ухаалаг гар утасгүйгээр төсөөлөшгүй болжээ. Автобусанд, ажил дээрээ, гэртээ — хаа сайгүй хүмүүс гар утсаа ширтэж суудаг. Энэ хандлага нь “text neck” syndrome хэмээх орчин үеийн өвчнийг бий болгосон гэж эрдэмтэд анхааруулж байна.
“Text Neck” гэж юу вэ?
“Text neck” буюу “мессежийн хүзүү” нь гар утас, таблет зэрэг төхөөрөмжийг удаан хугацаанд доош тонгойж ашигласнаас үүдэн хүзүү, мөр, нурууны булчинд байнгын даралт, ачаалал үүсч, улмаар бөгтөр нуруу, хүзүүний муруйлт үүсгэдэг хам шинж юм.
Эмч нарын мэдээлснээр, хүний толгой дунджаар 4–5 кг жинтэй байдаг. Хүн толгойгоо 60 градусын өнцгөөр бөхийлгөхөд хүзүүнд 20–27 кг орчим даралт ирдэг байна. Энэ нь байнгын булчингийн ачаалал, улмаар архаг өвдөлт үүсгэх гол шалтгаан болдог.
Ухаалаг утасны хэрэглээний дэлхийн хэмжээний өсөлт
Дэлхий даяар ухаалаг гар утас хэрэглэгчдийн тоо 2025 онд 5.8 тэрбумд, нийт төхөөрөмжийн тоо 7.4 тэрбумд хүрчээ.
Харьцуулбал, анхны iPhone гарсан 2007 онд ердөө 122 сая хэрэглэгч байсан нь өнөөгийн тооноос 50 дахин бага үзүүлэлт юм.
Судалгааны үр дүн — бие махбодийн ачаалал
“Surgical Technology International” сэтгүүлд нийтэлсэн судалгаагаар хүмүүс гар утсаа ашиглахдаа 45 градусын өнцгөөр бөхийдөг, энэ үед хүзүү, нурууны нугаламд 22 кг орчим даралт ирдэг гэжээ.
Энэ нь хүний хүзүүний булчинд ирэх хэвийн ачааллаас тав дахин өндөр бөгөөд жилдээ дунджаар 1,000–1,400 цагийн нэмэлт даралт үүсгэдэг байна.
Хэрхэн сэргийлэх вэ?
- Гар утсаа нүдний өндөрт өргөж ашиглах
- 20–30 минут тутамд хүзүүгээ амраах
- Дасгал хөдөлгөөнөөр булчингаа суллах
- Урт хугацаанд нэг байрлалд ажиллахгүй байх
Орчин үеийн энэ шинэ “өвчин” нь бидний технологийн хэт хамаарлын бодит үр дагавар юм. Хэрэв одооноос анхаарахгүй бол “text neck” хам шинж нь архаг хүзүү, нурууны өвдөлт, биеийн хэлбэрийн алдагдал дагуулах аюултай.
