10 хүний амь, 27 хүний аминд халдах оролдлого
Германы баруун бүсийн Вюрселен хотын эмнэлэгт ажиллаж байсан нэгэн эрэгтэй сувилагч өөрийн ажлыг хялбарчлахын тулд 10 өвчтөний аминд санаатайгаар хүрч, 27 хүнд халдахыг завдсан хэрэгт буруутай гэж үзэгдэн бүх насаар хорих ял сонслоо.
Шүүх хурал өчигдөр болж, хэрэгтний нэрийг нууцалсан бөгөөд шүүгч түүний үйлдлийг “онцгой харгис хэрцгий, хүнлэг бус” гэж тодорхойлон, 15 жилээс өмнө суллагдах эрхгүйгээр хорих шийдвэр гаргасан байна.
Өндөр настнуудад өндөр тунгаар тариа хийдэг байжээ
Шөнийн ээлжинд ажилладаг байсан уг сувилагч ихэвчлэн өндөр настай өвчтөнүүдэд тайвшруулах үйлчилгээтэй тариаг олон дахин илүү тунгаар шахдаг байсан аж.
Ингэснээр өвчтөнүүдийн амь нас аюулд орж, зарим нь тэр даруй нас барсан байна.
Мөрдөгчдийн мэдээлснээр уг хүн 2023 оны арванхоёрдугаар сараас 2024 оны тавдугаар сар хүртэлх хугацаанд энэ хэргүүдийг үйлджээ. Тэрбээр морфин болон булчин сулруулах үйлчилгээтэй бодисуудыг ашигласан нь шинжилгээгээр тогтоогдсон байна.
Хэрэгтний өнгөрсөн ба мөрдөн шалгалтын явц
Тэрээр 2007 онд сувилагчийн мэргэжлийн сургууль төгсөж, 2020 оноос Вюрселен хотын эмнэлэгт ажиллаж эхэлжээ.
Одоогоор мөрдөгчид түүний холбоотой байж болзошгүй өөр хэд хэдэн сэжигтэй нас баралтуудыг шалгаж байгаа бөгөөд хэрэв нэмэлт баримт илэрвэл шинэ хэрэг нээх боломжтой гэж мэдээлжээ.
Өмнөх ижил хэрэг — Нилс Хёгелийн жишээ
Германд үүнтэй төстэй аймшигт хэрэг өмнө нь ч гарч байсан.
2019 онд тус улсын хойд хэсгийн хоёр эмнэлэгт 85 өвчтөний амийг хөнөөсөн сувилагч Нилс Хёгел мөн бүх насаар хоригдсон билээ.
Тэрбээр 1999–2005 онд зүрхний эмийг өндөр тунгаар хийж өвчтөнүүдийг санаатайгаар хордуулсан нь тогтоогдож, Германы орчин үеийн түүхэнд хамгийн олон хүний амийг хөнөөсөн алуурчин хэмээн нэрлэгдсэн байдаг.
Үнэхээр аймшигтай хэрэг, итгэмээргүй байна
Ийм хүн эмнэлэгт ажиллаж байсан гэхэд үнэхээр харамсалтай