2025 оны долдугаар сарын 19-ний шөнө Хүүхдийн 100 орчимд гарсан зодооны хэрэгт холбогдсон УИХ-ын гишүүн асан Цэрэнпунцагийн хүү Ц.Санжаачойпэл, “Эрэл”-ийн Эрдэнэбатын хүү Э.Тэмүүлэн, Л.Алтан-Очир болон “Говь” ХК-ийн гүйцэтгэх захирал Б.Амарсайхан нарт холбогдох мөрдөн шалгах ажиллагаа дуусжээ.
Эдгээр иргэд хохирогч Д.Саяннямбуугийн биед халдаж, эрүүл мэндэд нь хохирол учруулсан хэрэгт сэжиглэгдэж байгаа бөгөөд хэргийг цагдаагийн байгууллагаас яллах дүгнэлт үйлдүүлэхээр прокурорт хүргүүлсэн байна.
Прокурорын шатны ажиллагаа үргэлжилж байна
Прокурорын байгууллага одоогоор хэргийг хянаж байгаа бөгөөд шүүхэд шилжүүлэх эсэхийг шийдэж амжаагүй байна. Хэргийн яллах дүгнэлт батлагдвал Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд шилжүүлж, хэрэг шийдвэрлэх ажиллагаа эхэлнэ.
Одоогоор холбогдогч нарыг ямар зүйл ангиар яллагдагчаар татах нь тодорхойгүй байгаа юм.
Хэргийг мөрдөн шалгах явц
Хэргийг мөрдөх явцад долдугаар сарын 23-нд прокурорын байгууллагаас шүүхэд цагдан хорих хүсэлт гаргахдаа Э.Тэмүүлэн, Ц.Санжаачойпэл, Л.Алтан-Очир нарыг “согтуурсан, мансуурсан үедээ” гэмт хэрэг үйлдсэн байж болзошгүй гэж үндэслэлдээ дурдсан байжээ.
Харин хохирогч гэж нэрлэгдсэн Д.Саяннямбууг “харилцан зодоон”-д оролцсон гэж үзэн, “хүний биед санаатай хөнгөн хохирол учруулсан” үндэслэлээр яллагдагчаар татсан байна.
Б.Амарсайханыг Таиландаас баривчилж, эх оронд нь авчирсан
“Говь” ХК-ийн гүйцэтгэх захирал Б.Амарсайхан хэрэг гарснаас хойш хилээр гарч явсан бөгөөд 2025 оны есдүгээр сард Таиландаас баривчлагдан Монгол Улсад шилжүүлэн авчирсан байна.
Харин бусад гурван холбогдогч — Ц.Санжаачойпэл, Э.Тэмүүлэн, Л.Алтан-Очир нарыг хэрэг гарснаас хойш удаа дараа цагдан хорьж байгаад есдүгээр сарын сүүлчээр таслан сэргийлэх арга хэмжээг дуусгавар болгожээ.
Прокурорын байгууллагаас яллах дүгнэлт боловсруулж дууссаны дараа хэргийг шүүхэд шилжүүлэх бөгөөд энэ хэрэг олон нийтийн анхаарлын төвд байсаар байна.
