Гадаадын иргэн, харьяатын газар (ГИХГ) цахим системийн шинэчлэлийн хүрээнд виз сунгах болон виз шилжүүлэх үйлчилгээг шинэ ISF.mn системд шилжүүллээ.
2025 оны арваннэгдүгээр сарын 11-нөөс эхлэн гадаадын иргэдийн визийн хугацаа сунгах, виз шилжүүлэх хүсэлтийг immigration.gov.mn сайтаар дамжуулан шинэ ISF.mn системээр хүлээн авч байна.
Ингэснээр өмнө нь e-visa.mn системээр үзүүлж байсан үйлчилгээ зогсож, бүх хүсэлт, баримт бичгийг шинэ платформоор дамжуулан илгээх зохицуулалт хэрэгжинэ.
Хэрхэн ашиглах вэ?
- Гадаадын иргэн, уригч иргэн, аж ахуйн нэгж нь ISF.mn системийн “Виз” цэсээр нэвтэрч, хүсэлтээ илгээнэ.
- Уригч байгууллага — эрх бүхий байгууллагаас олгосон тоон гарын үсгээр нэвтрэнэ.
- Гадаадын иргэн — цахим хаягаар бүртгэл үүсгэж нэвтрэх боломжтой.
Хүсэлтийг хянаж, зөвшөөрсний дараа тухайн гадаадын иргэн эсвэл итгэмжлэгдсэн төлөөлөгчид QR code бүхий хариу цахим шуудангаар илгээгдэх юм.
ГИХГ-ийн мэдээлснээр энэ шинэчлэл нь цахим үйлчилгээний хүртээмж, хурд, найдвартай байдлыг нэмэгдүүлэх зорилготой бөгөөд иргэд байгууллагын системд нэг удаа бүртгэгдэн бүх төрлийн визийн үйлчилгээ авах боломжтой болж байна.
