Салах ёсны ёслол хаана, хэзээ болох вэ?
Монгол Улсын Гавьяат тамирчин, Монгол Улсын Арслан Доржпаламын Ганхуяг агсныг 2025 оны 11 дүгээр сарын 28-ны Баасан гарагт сүүлчийн замд нь үдэхээр боллоо.
Талийгаачийг үдэх хүндэтгэлийн ёслол 2025 оны 11 дүгээр сарын 28-ны өдрийн 05:40–07:30 цагийн хооронд Соёлын төв өргөөнд зохион байгуулагдана. Энэ бол зөвхөн нэг хүнийг үдэх ёслол бус, Монголын спортын түүхэнд гүн мөр үлдээсэн ноён оргилоо хүндэтгэн дурсах нийт спорт сонирхогчдын мөч байх юм.
Олон төрөлт спортын ноён оргил
Д.Ганхуяг нь Монголын ард түмэнд:
Өсөх идэр, Улам нэмэх, Уран мэхт, Хурц шаламгай, Өрнөн дэлгэрэх, Үлэмж бадрах Монгол Улсын Арслан, Монгол Улсын Гавьяат тамирчин цолтойгоороо танигдсан билээ.
Тэрээр:
- Чөлөөт бөх
- Жүдо
- Самбо
- Сумо
- Сонгомол бөх
- Кураш
- Рагби
төрлүүдэд олон улсын хэмжээний мастер цол хүртсэн, мөн сагсан бөмбөгийн спортын мастер байсан нь түүнийг жинхэнэ утгаараа “спортын олон талын суутан” гэдгийг баталдаг.
Ямар ч спортын төрөлд хөл тавьсан бай, тэрбээр сэтгэл зүрхээ бүрэн зориулж, тууштай, дайчин чанараараа үзэгч, үеийнхэн, шавь нарынхаа хүндлэлийг хүлээсэн. Түүний тоглолт, ялалт бүхэн ирээдүйн тамирчдад зориг, үлгэр дуурайл, сэтгэлийн хүчний бэлгэ тэмдэг болон үлдсэн.
АПУ-д өнгөрүүлсэн 23 жил: байгууллагын спортын нүүр царай
Д.Ганхуяг агсан АПУ компанид 2002 оноос хойш 23 жилийн турш тасралтгүй ажилласан. Иргэн хүнийхээ хувьд төдийгүй тамирчин, зохион байгуулагчийн хувиар тэр тус байгууллагын дотоод соёл, спортын амьдралыг бүрэлдүүлэгч гол тулгуур багана байлаа.
Тэрээр:
- “АПУ Олимп”
- “Үргэлж өөдөө” сагсан бөмбөг, волейболын лиг
зэрэг компанийн спортын томоохон төслүүдийг манлайлан зохион байгуулж, хамт олны эв нэгдэл, спортын уур амьсгалыг бэхжүүлэхэд үнэтэй хувь нэмэр оруулсан.
АПУ олимп, Шунхлай олимп, Хүнсчдийн спорт наадам, Бизнес лиг, УСУГ-ын нэрэмжит, ҮЭХ-ны болон МҮХАҮТ-ийн нэрэмжит олон тэмцээнд баг, хамт олноо удирдан оролцож, ихэнхдээ түрүү цомоо гартаа атган буцдаг байсан нь түүний хэн байсныг тодхон харуулна.
Цэргийн алба, “Алдар” спорт хороонд хийсэн гавьяа
Дэд хурандаа Д.Ганхуяг нь Зэвсэгт хүчний бүтцэд ч спортыг хөгжүүлэхэд томоохон үүрэг гүйцэтгэжээ. Тэрбээр:
- Зэвсэгт хүчний 124 дүгээр ангид биеийн тамир, спорт хариуцсан дарга
- Зэвсэгт хүчний 256 дугаар ангид хэмжил зүйн офицер
- Зэвсэгт хүчний “Алдар” спорт хороонд техник спортын бүлгийн дарга, төвийн дарга
- Биеийн тамир, чийрэгжүүлэлтийн төвийн даргаар
тус тус ажилласан байна.
“Алдар” спорт хороонд ажиллаж байх хугацаандаа тэр Зэвсэгт хүчнийг төлөөлөн Дэлхийн цэргийн спортын холбоо (CISM)-ны олон улсын тэмцээн уралдаанд баг тамирчдаа амжилттай удирдан оролцуулж, цэргийн спортын нэр хүндийг өндөрт өргөж чадсан.
Түүний гавьяаг үнэлсэн шагнал, хүндэтгэл
Д.Ганхуяг агсны хөдөлмөр, зүтгэлийг төр, цэрэг, спортын байгууллагууд дараах нэр хүндтэй шагналаар үнэлжээ:
- “Дайчин алдар” III, II зэргийн медаль
- “Эх орны төлөө” I, II зэргийн медаль
- “Цэргийн хүндэт” тэмдэг
- Батлан хамгаалах яамны “Тэргүүний ажилтан”
- Батлан хамгаалах яамны хүндэт тэмдэг
- Ардын хувьсгал, Зэвсэгт хүчний ойрын медалиуд
Эдгээр нь зөвхөн тамирчны ур чадвар бус, хүн чанар, сахилга бат, эх оронч үзэл, удирдах чадварыг нь давхар нотолж байна.
Залгамж халаа, хүнлэг чанар, үлдээсэн өв
Спортыг байгууллагын дотоод соёл болгож, хамт олныг нэгтгэж чаддаг хүн ховор. Д.Ганхуяг агсан бидэнд:
- спортын өрсөлдөөнч сэтгэлгээ
- бууж өгөхгүй тэмцэх сэтгэлийн хат
- ялах, ялагдахыг жудагтай хүлээж авах ухаан
зэргийг өөрийн жишээгээр сургасан.
Түүний эрдэмт даруу, жудагтай, шударга, дайчин зан, амгалан төрх, зөөлөн дөлгөөн, хүнлэг, найрсаг араншин нь хамт олон, анд нөхөд, шавь нарынх нь сэтгэлд үүрд үлдэх болно.
Тэр зөвхөн нэр алдартай тамирчин байгаагүй, харин олон хүний нүдэнд уул шиг түшиг тулгуур, спортын гайхамшгийг бусдад мэдрүүлж чадсан, хойч үеэ сургаж, дэмжиж, урам хайрласан “том хүний” нэг байлаа.
