Морьт харвааны олон улсын тэмцээн 12-р сарын 8–13-нд болж байна
Хятадын Шэньжэнь хотод арванхоёрдугаар сарын 8-13-ны өдрүүдэд морьт харвааны олон улсын тэмцээн үргэлжилж байна. Уг тэмцээн эхний ээлжинд өсвөр үеийн ангиллаар эхэлсэн бөгөөд Монголын тамирчид амжилтын буухиаг эхнээс нь өндөр түвшинд тавьжээ.
“Цамхаг намнах” төрөлд Г.Түмэнбуяндэлгэр тэргүүн байр эзлэв
Өсвөр үеийн төрөлд “Намнаа” академийн Н.Алтанхуяг багшийн шавь, Өвөрхангай аймгийн Хархорин сумын харьяат 17 настай Ганбаатарын Түмэнбуяндэлгэр “Цамхаг намнах” төрөлд тэргүүн байр эзэлж, алтан медаль хүртсэн байна.
Тус төрөл нь морины хурдтай давхил дунд 45–50 метрийн зайнаас онилон харвах ур чадвар шаарддаг бөгөөд хурд, анхаарал төвлөрөл, сум тавих техник зэрэг олон хүчин зүйлийг нэгэн зэрэг шалгадаг өрсөлдөөн гэдгээрээ онцлог юм.
