Өмнөд Солонгосын нэрт жүжигчин Жан Хёг энэ сарын 18-нд Монгол Улсад ирсэн байна. Тэрээр KBS телевизийн түүхэн томоохон бүтээл болох “Munmu” цувралд дүр бүтээж байгаа бөгөөд уг төслийн нийт төсөв ойролцоогоор 30 тэрбум вон гэж мэдээлэгджээ.
Монголд тулааны томоохон хэсгийг авчээ
Цувралын Монгол дахь тулаант хэсгийн зураг авалт энэ сарын 20-нд эхэлж, нийт таван өдрийн турш үргэлжилсэн байна. Кино багийнхан түүхэнд “Жүпилсаны тулаан” хэмээн тэмдэглэгдэн үлдсэн томоохон тулааны хэсгийг Монголын нутагт дүрсжүүлжээ.
Тэд өмнө нь буюу 2025 оны өвөл мөн Монголд ирж, -25 градусын хүйтэнд зураг авалт хийгээд буцсан байна. Когурё болон Тан улсын армийн хооронд болсон нүсэр тулааныг бодитоор харуулахад өргөн уудам тал, задгай хээр нутаг хамгийн тохиромжтой гэж үзсэн тул Монголыг зураг авалтын байршлаар сонгосон аж.
Алдартай жүжигчид нэг дор цугларчээ
“Munmu” цувралд Жан Хёгоос гадна Өмнөд Солонгосын олон чадварлаг жүжигчин тоглож байна. Тухайлбал, жүжигчин И Хён Үк, Ким Ган Ү, Пак Сон Үн, Жон Үн Ин, Жу Сон Ха зэрэг уран бүтээлчид дүр бүтээжээ.
Ийм бүрэлдэхүүнтэй, өндөр төсөвтэй түүхэн цуврал гэдгээрээ уг бүтээл анхнаасаа үзэгчдийн анхаарлыг татаж эхэлсэн байна.
28 ангитайгаар 2026 онд үзэгчдэд хүрнэ
Цуврал нийт 28 ангитай байх бөгөөд 2026 оны 11 дүгээр сард багтаан дэлгэцнээ гарахаар төлөвлөгджээ.
Ийнхүү KBS-ийн түүхэн бүтээл болох “Munmu” цуврал Монголын тал нутагт зураг авалтаа хийж, Когурё болон Тан улсын армийн хоорондох түүхэн тулааныг өргөн цар хүрээтэйгээр харуулахаар бэлтгэгдэж байна.
