Бүх оддын тоглолт гурван хэсгээр үргэлжилэв
Монголын Волейболын Дээд лигийн 2025-2026 оны бүх оддын тоглолт өнгөрсөн амралтын өдөр болж өндөрлөлөө. 30 дахь улиралдаа зохиогдож буй энэ арга хэмжээ заал дүүрэн үзэгчтэй, баяр хөөр, дурсамж дүүрэн уур амьсгалтай болсноороо онцлог байв. Тоглолт эрэгтэй бүх одод, эмэгтэй бүх одод, холимог оддын гэсэн гурван хэсгээс бүрдэж зохион байгуулагдлаа.
Эрэгтэй, эмэгтэй одод уран тоглолтоороо үзэгчдийг татав
Эрэгтэй, эмэгтэй бүх оддын тоглолтод үзэгчдийн саналаар шалгарсан дотоод, гадаадын шилдгүүд талбайд гарч, уран хууралт, хүчтэй довтолгоо, гоёмсог шийдлээр өрсөлдөн хөгжөөн дэмжигчдээ гайхшруулсан тоглолтыг үзүүлэв. Бүх оддын тоглолтын гол өнгө аяс нь өрсөлдөөнөөс гадна шоу, үзүүлбэрийн хэв маягтайгаар илүү нээлттэй, хөгжилтэй байдалд чиглэж байсан нь мэдрэгдсэн байна.
“Polaris” 19:17-оор шийдвэрлэх үед ялж шилдэг болов
Үндэсний Дээд лигийн эмэгтэй бүх оддын тоглолтын бүрэлдэхүүнийг санал асуулгаар сонгож, “Polaris” болон “Цасан охид” багууд эн тэнцүү өрсөлдөн таван үе тоглолоо. Шийдвэрлэх тавдугаар үед 19:17 харьцаагаар “Polaris” давамгайлж, шилдгээр тодорсон байна. Тоглолтын төгсгөлд Б.Хулан хүчтэй давуулалт хийснээр “Polaris” баг ялалтаа баталгаажуулжээ.
Эрэгтэй тоглолт таван үед “No Chance”-ийн талд эргэв
Эрэгтэй бүх оддын тоглолт мөн адил гал гарсан таван үеийн өрсөлдөөн болж, эцэст нь “No Chance” баг хожил байгууллаа. Энэ тоглолтыг дотоод болон гадаад тоглогчдын өрсөлдөөн гэж тодорхойлж болохоор байв. Лигийн шилдэг довтлогчдоор нэрлэгддэг Б.Батсуурь, М.Уранбаяр нарын тоглолт онцгой харагдаж, ялалтын гол шугамд нөлөөлсөн гэж дурдагдлаа. Тэд өмнө нь нэг багт хамт тоглож байсан багийн хамтрагчид юм.
Шилдэг тоглогчийн хувьд эрэгтэйгээс “Эс Жи Хавкс” багийн ахлагч, ОУХМ Б.Батсуурь тодорсон бол эмэгтэйгээс Х.Нэргүй бүх оддын шилдгээр нэрлэгдэв.
Холимог оддын тулаан хамгийн их анхаарал татаж, 10 саяын эзэд тодров
Бүх оддын тоглолтын хамгийн сонирхолтой хэсэг нь холимог оддын тоглолт хэвээр байлаа. Өнгөрсөн жилийн бүх оддын тоглолтод О.Хангай аварга тэргүүтэй баг Баярбат тэргүүтэй багийг гурван үеийн тоглолтод төвөггүй буулган авч байсан бол энэ удаа жүжигчин М.Баярбат О.Хангай аваргатай даагаа нэхсэн нь олны анхаарлыг төвлөрүүлэв. Өнгөрсөн жил О.Хангай аварга охины хамт холимог оддын талбайд нэг багаас гарч байсан бол энэ удаа түүний гэргий Н.Дэлгэртуяа эсрэг багаас тоглосон нь тоглолтын нэгэн чимэг болжээ.
Холимог оддын тоглолтод урлаг, спортын олон нэртэй оролцогчид талбайг “солонгоруулав”. Тухайлбал МУГЖ Н.Ариунболд, МУГЖ Д.Бямбацогт, түүний хүү Б.Балжинням, шигшээ багийн тоглогч О.Эрдэнэцогт, МУГТ М.Цэрэнлхам, улсын арслан Б.Орхонбаяр зэрэг одод 30 дахь удаагийн холимог оддын тоглолтод оролцсон байна.
Эхний үе 21:19-өөр Улсын аварга О.Хангайгаар ахлуулсан “Бөртэ Чоно” багийн талд өндөрлөж, тоглолтын хэмнэлийг түрүүлж атгав. Харин “Нам наанаа” гэсэн уриатайгаар оролцсон СТА, жүжигчин М.Баярбат ахлагчтай “НамНаа” баг хоёрдугаар үед хариугаа 21:13 харьцаагаар авч чаджээ. Шийдвэрлэх гуравдугаар үед О.Эрдэнэцогт төгсгөл хийж, 15:13-аар ялалт байгуулснаар “НамНаа” баг 10 сая төгрөгийн эзэн болсон байна.
Тус тоглолтод сагсан бөмбөгийн шигшээ багийн тамирчин О.Эрдэнэцогт холимог оддын шилдэг тоглогчоор тодорсон талаар мэдээлэв. Тэрбээр сагсан бөмбөгт орохоосоо өмнө волейболын спортоор хичээллэж байсан нь энэ удаагийн талбай дээр дахин нэг удаа яригдсан онцлох баримт байлаа.
Холимог оддын тоглолтын шүүгчдийн бүрэлдэхүүн
Холимог оддын тоглолтын 1-р шүүгчээр ОУХМ Б.Батсуурь, 2-р шүүгчээр Э.Энх-Амгалан, 3-р шүүгчээр М.Уранбаяр ажилласан байна.
