Монголын тамирчин “Дакар Ралли”-д шилдэг 16-д шалгарлаа
“Тал нутгаас Дакарт” төслийн хүрээнд өрсөлдсөн Монгол Улсын Гавьяат тамирчин, олон улсын хэмжээний мастер Э.Халиунболд автомотоспортын хамгийн нэр хүндтэй тэмцээн болох “Дакар Ралли”-д түүхэн амжилт гаргалаа.
Тэрбээр 13 гарааны уралдааны нийлбэр дүнгээр:
- Ерөнхий зэрэглэлд топ 20-т багтаж, 16 дугаар байрт
- Ралли-2 ангилалдаа шагналт 6 дугаар байрт
шалгарч, Монголын тамирчдын “Дакар Ралли”-д үзүүлсэн хамгийн өндөр амжилтуудын нэгийг шинэчлэн тогтоов.
“Best Rookie” төрөлд шагнал хүртэв
Э.Халиунболд энэ удаагийн тэмцээнд анх удаа оролцож буй тамирчдын дундах өрсөлдөөнд мөн өндөр амжилт гаргасан. Тэр:
- “Best Rookie” буюу шилдэг шинэ тамирчны төрөлд 3 дугаар байр
- Тусгай шагнал, дурсгалын медаль, цом
хүртэн, шинэ оролцогчдын дундаас онцгойрч чадлаа.
П.Мөрөн тогтвортой уралдаж, өндөр байр эзэллээ
Монголын багийн өөр нэг гишүүн, олон улсын хэмжээний мастер П.Мөрөн ч тэмцээнийг амжилттай дуусгав. Тэр:
- Нийлбэр дүнгээр 29 дүгээр байр
- Ралли-2 ангилалд 19 дүгээр байр
эзэлж, хатуу нөхцөлтэй, урт зайтай раллид тогтвортой уралдаж чадсанаараа анхаарал татлаа.
“Дакар Ралли”-д Монголын нэрийг цуурайтуулсан онцгой тэмцээн
“Дакар Ралли” нь автомото спортын ертөнцөд “Олимп” хэмээн нэрлэгддэг, дэлхий даяар хамгийн их анхаарал татдаг ралли уралдааны нэг. Энэ жилийн тэмцээн:
- Саудын Арабын Хант Улсын нутгаар
- Нийт 7,600 км замд
- 13 гараатай
- 2026 оны 1 дүгээр сарын 3-17-ны өдрүүдэд
зохион байгуулж өндөрлөлөө.
Хагас сарын турш 190 гаруй улс оронд, тэрбум гаруй хүний нүдийг өөртөө татсан энэ томоохон тэмцээнд Монголын тамирчид ийнхүү амжилттай оролцож, олон улсын индэр дээр Монголын далбааг өндөрт мандууллаа.
