Hailey Bieber жирэмслэлт, төрөх үеийн аюултай мөчүүдээ ил болгов
29 настай загвар өмсөгч Хэйли Бибер жирэмслэлтийнхээ ар талд өрнөсөн хүнд сорилт, амь насанд хүрсэн эрсдэлийн талаар ярьжээ. Тэрээр эцэст нь хүү Жак Блюзоо тэвэрч авах хүртэл юу туулснаа олон нийтэд нээлттэй хуваалцсан байна.
Подкаст дээр цочирдом оношоо хуваалцав
Саяхан Хэйли “SHE MD” подкастад оролцохдоо 19 сартай хүүгээ төрүүлэхээс өмнө огт төсөөлөөгүй оноштой тулгарснаа хэлсэн байна. Тэрээр жирэмслэхээсээ өмнө “умайн таславч” гэх төрөлхийн эмгэгтэй гэдгээ мэдсэн аж. Энэ нь умайн хөндий дотор ханан таславч үүсэж, зайг хоёр хуваадаг гажиг бөгөөд жирэмслэлтийн явцад зулбах эсвэл дутуу төрөх эрсдэлийг мэдэгдэхүйц нэмэгдүүлдэг.
Тухайн үед эмч нь анхааруулж, “Магадгүй мэс засал шаардлагатай, тиймээс яг одоо жирэмслэхийг хатуу хориглоно” гэжээ. Гэвч удалгүй Хэйли өөрийгөө жирэмсэн болсноо мэдсэн байна. Эмч нь энэ тухай дурсахдаа, “Жирэмсэн болсон гэдгийг сонсоод би шууд ‘Үгүй’ гэж орилсон” хэмээн хэлж, нөхцөл байдал хэр түгшүүртэй байсныг илэрхийлжээ.
Эрсдэл өндөр байсан ч айдсаа даван туулжээ
Хэйлигийн тохиолдол “дунд зэрэг” гэж ангилагдаж, зулбах магадлал 25–40 хувь, дутуу төрөх эрсдэл бараг 20 хувьтай байсан гэжээ. Тэрээр жирэмсний явцад хүүхэд өсөх тусам умайн доторх таславч тэлж буйг өөрөө мэдэрч, “Хүүхэд өсөх тусам умайн доторх таславч томорч байгааг би харж байсан, мөч бүр аймшигтай санагддаг байсан” гэж дурссан байна.
Гэсэн ч тэрээр сэтгэлээр унахгүйг хичээж, бүх зүйл сайн болно гэж итгэн өөрийгөө зоригжуулсаар байсан бөгөөд азаар хүүхэд эрүүл саруул төрөхөд бэлэн болжээ.
18 цагийн төрөлт “жинхэнэ тулаан” болсон нь
Жирэмсний явц өөрөө амаргүй байсан ч төрөх мөчийг Хэйли “жинхэнэ тулаан” гэж нэрлэсэн байна. 39 дэх долоо хоног дээр ураг орчмын шингэн гоожиж эхэлснээр эмнэлэгт төрүүлэхийг өдөөн эхлүүлжээ. Эпидурал мэдээ алдуулалт хийлгэлгүйгээр тэр 18 цагийн турш өвдөлтийг тэсвэрлэсэн байна. Тэрээр энэ үеэ “Миний амьдралдаа хийж үзсэн хамгийн хэцүү зүйл байсан, үнэхээр галзуу мэт санагдсан” гэж тодорхойлжээ.
Төрсний дараах хамгийн том аюул: их хэмжээний цус алдалт
Хамгийн ноцтой хямрал хүүхдээ төрүүлсний дараа шууд тохиолдсон байна. Хэйли төрсний дараах цус алдалтад орж, нөхцөл байдал амь насанд нь хүрсэн тухайгаа “Би маш их цус алдсан болохоор ‘Би амьд үлдэхгүй байх’ гэж хүртэл бодсон” хэмээн ярьжээ. Түүний хэлснээр тэр мөчид амьд гарах эсэх нь тодорхойгүй мэт санагдаж, үхэл бодолд нь орж ирсэн байна.
Ээж болсон дараах сэтгэлзүйн сорилт ба өөрийгөө хүлээн зөвшөөрөх зам
Хүүгээ эсэн мэнд тэвэрсэн ч Хэйли төрсний дараах биеийн өөрчлөлтдөө дасах үедээ сэтгэл гутралтай нүүр тулснаа хүлээн зөвшөөрчээ. Тэрээр аарцаг тэлж, биеийн хэлбэр өөрчлөгдсөнийг хараад өөртөө хатуу хандахгүй байх цаг хэрэгтэй болсон гэдэг. “Миний бие өмнөхтэйгээ адил биш болсон” гэж тэр хэлээд, “Гэхдээ би үүнийг байгаагаар нь хүлээн зөвшөөрөхөөр шийдсэн” хэмээн өөрчлөлтөө даван туулах шийдвэр гаргаснаа илэрхийлжээ.
Дараа нь Жастин Бибертэй холбоотой зөрчил, хөндийрлийн тухай цуурхал гарч байсан ч Хэйли энэ бүхнийг хүүгээ гэсэн хүчтэй хайр, эх хүний зөн совингоор даван гарсан гэж эх сурвалжууд онцолжээ.
