Тафтсын их сургууль болон хамтрагч байгууллагуудын эрдэмтэд CALERIE хэмээх олон жилийн судалгааны шинэ үр дүнг танилцууллаа. Судалгаагаар хоолны илчлэгийг дунд зэрэг бууруулах нь цусны даралт болон “муу” холестерины түвшинг бууруулахтай холбоотой болохыг тогтоосон байна.
CALERIE буюу “Эрчим хүчний хэрэглээг бууруулах урт хугацааны үр нөлөөний иж бүрэн үнэлгээ” судалгаанд таргалалтгүй 218 хүн хамрагджээ. Тэдний 143 нь хоёр жилийн турш өдөр тутмын калорийн хэрэглээгээ 25 хувиар багасгахыг зорьсон бол 75 хүн хяналтын бүлэгт багтаж, өмнөх хэвийн хооллолтоо үргэлжлүүлсэн байна.
Судалгааг Тафтсын их сургуулийн дэргэдэх Хүний хоол тэжээлийн судалгааны төв, Вашингтоны их сургууль болон Луизиана мужийн их сургууль гэсэн гурван төвд явуулжээ. Ажлын эхний үе шат 2011 онд дууссан байна.
25 хувь биш, 12 хувийн бууралт ч эерэг үр дүн үзүүлжээ
Судалгааны үндсэн бүлгийн оролцогчид төлөвлөсөн 25 хувьд хүрээгүй ч бодит байдал дээр калорийн хэрэглээгээ дунджаар 12 хувиар бууруулсан байна. Гэсэн ч энэ хэмжээний өөрчлөлт эрүүл мэндийн хэд хэдэн үзүүлэлтэд мэдэгдэхүйц эерэг нөлөө үзүүлжээ.
Калорио бууруулсан оролцогчдын цусны даралт, бага нягтралтай липопротеин буюу “муу” холестерин, инсулины түвшин хяналтын бүлэгтэй харьцуулахад статистикийн хувьд ач холбогдолтойгоор буурсан байна.
Мөн тэд дунджаар биеийн жингийнхээ 10 орчим хувийг хасжээ. Гэхдээ судалгааны үндсэн зорилго нь жин бууруулах бус, калорийн хязгаарлалт эрүүл мэндийн үзүүлэлтүүдэд хэрхэн нөлөөлөхийг шалгах байсан юм.
Шээсний шинжилгээгээр калорийн хэрэглээгээ багасгасан оролцогчдын биед идэвхтэй хүчилтөрөгчийн хэлбэрүүдийн түвшин буурсан нь тогтоогджээ. Эдгээр тогтворгүй молекулууд нь эсийг гэмтээж, биологийн хөгшрөлт болон зарим өвчний эрсдэлтэй холбоотой гэж үздэг.
Хоолны шим тэжээл буураагүй байна
Энэ онд нийтлэгдсэн өөр нэг дүн шинжилгээнд калорийн хэрэглээг багасгасан нь хоолны шим тэжээлийн чанарыг муутгаагүй гэж мэдээлжээ. Оролцогчид олон төрлийн амин дэм, кальцийн нэмэлт хэрэглэсэн эсэхээс үл хамааран шаардлагатай шим тэжээлээ хангалттай авч байсан байна.
HNRCA-ийн ахлах судлаач Сай Крупа Дасын хэлснээр эрүүл мэндийн эерэг өөрчлөлтүүд ихэнх хүнд боломжтой, харьцангуй зөөлөн хэмжээний калорийн хязгаарлалтаар гарсан нь чухал ач холбогдолтой аж.
Судлаачид илүүдэл жинтэй болон таргалалттай хүмүүст ийм төрлийн калорийн бууралт илүү хүчтэй нөлөө үзүүлж магадгүй гэж таамаглаж байна. Гэхдээ үүнийг батлахын тулд тусдаа судалгаа хийх шаардлагатай гэж үзжээ.
Энэхүү судалгаа нь хоолны илчлэгийг огцом бус, харин дунд зэрэг бууруулах нь цусны даралт, холестерин, инсулин зэрэг эрүүл мэндийн гол үзүүлэлтүүдэд эерэг нөлөөтэй байж болохыг харуулж байна.
