Португалийн шигшээ багийн төлөө 23 жилийн турш 232 тоглолтод оролцож, 146 гоол оруулсан, Дэлхийн аварга шалгаруулах тэмцээнд зургаан удаа хүч үзсэн 41 настай хөл бөмбөгийн домог Криштиану Рональдугийн олон улсын карьер төгсгөлдөө ойртож байна.
Тэрбээр маргааш болох ДАШТ-ий шөвгийн 16 багийн тоглолтын өмнөх өдөр Даллас хотод хэвлэлийн хурал хийж, энэ удаагийн тэмцээн өөрийнх нь хувьд сүүлчийн Дэлхийн аварга болохыг хүлээн зөвшөөрчээ.
“Энэ бол миний сүүлчийн ДАШТ байх болно”
Рональду хэвлэлийн хурлын үеэр өөрийн ирээдүйн талаар нээлттэй ярьсан байна.
“Энэ бол миний сүүлчийн ДАШТ байх болно. Хэрвээ бурхан хүсвэл маргаашийн тоглолт миний сүүлчийн тоглолт ч биш байж болох юм. Хэрвээ тийм бол тийм л байна биз. Хэрвээ бурхан намайг цом өргөхийг эсэргүүцэж байгаа бол түүгээр нь болох байх” гэж Рональду хэлжээ.
Тэрбээр цааш нь ярихдаа “Надад юу ч дутаагүй. Бурхан надад хангалттай өгөөмөр хандсан. Би ДАШТ-д түрүүлсэн, түрүүлээгүйгээсээ болоод муудахгүй, бас сайжрахгүй” гэж хэлсэн байна.
2003 онд эхэлсэн шигшээ багийн замнал
Криштиану Рональду анх 2003 онд Португалийн шигшээ багийн бүрэлдэхүүнд талбайд гарч байв. Тэр үед Шавиш хотын цэнгэлдэх хүрээлэнд 8,000 үзэгчийн өмнө Казахстаны эсрэг тоглолт болсон бөгөөд Рональду домогт Луиш Фигугийн оронд сэлгээнээс гарч тогложээ.
Ийнхүү эхэлсэн түүний шигшээ багийн замнал 23 жил үргэлжилж, Португалийн хөл бөмбөгийн түүхэн дэх хамгийн тод, хамгийн нөлөө бүхий карьеруудын нэг болсон юм.
Испанийн эсрэг тоглолт сүүлчийнх нь байж магадгүй
Маргааш Даллас хотод 80,000 хөгжөөн дэмжигчийн өмнө Португал Испанийн эсрэг ДАШТ-ий шөвгийн 16 багийн тоглолтоо хийнэ. Энэ тоглолт Рональдугийн хувьд шигшээ багийнхаа төлөөх сүүлчийн тоглолт болж магадгүй байна.
Хэрэв Португал ялалт байгуулж цааш шалгарвал түүний төгсгөл хэдхэн өдрөөр хойшлох боломжтой. Харин ялагдвал Рональдугийн олон улсын тайзан дээрх замнал бодитоор өндөрлөх юм.
“Хамгийн гол нь бид давж гарч чадах эсэх асуудал”
Өмнө нь олон улсын карьерынхаа төгсгөлийн талаар тодорхой хариулт өгөхөөс зайлсхийдэг байсан Рональду энэ удаа илүү итгэлтэй, илүү шууд ярьжээ.
“Та нар үргэлж нэг асуултыг асуудаг. Энэ сүүлчийнх үү гэж. Юу болохыг харцгаая. Би үүнд анхаарал хандуулахыг хүсэхгүй байна. Энэ тийм ч чухал биш. Хамгийн гол нь бид давж гарч чадах эсэх асуудал” гэж тэр эхлээд хэлсэн юм.
Гэвч дараа нь тэрбээр байр сууриа улам тодорхой илэрхийлсэн байна.
“Үнэнийг хэлэхэд маргааш юу ч болсон бай, бүр 100 хувь ч биш, 1,000 хувийн ухамсартайгаар би замналаа дуусгах болно. Учир нь би хөл бөмбөгт бүх зүйлээ өгсөн. Миний амьдрал дутуу юм байхгүй. Гэхдээ би дуртай болохоороо л хөл бөмбөг тоглодог. Маргааш юу ч болсон бай би заавал хожих үүрэгтэй гэж өөртөө дарамт үүсгэмээргүй байна. Болох ёстой юм болдгоороо болно. Би гурван гоол оруулаад байна. Энэ тийм ч муу үзүүлэлт биш биз дээ?” гэж тэр хэлжээ.
Хэвлэлүүдэд хандан хатуу үг хэлэв
Рональду хэвлэлийн хурлын үеэр олон жилийн турш өөрийг нь шүүмжилж, дарамталж ирсэн хэвлэл мэдээллийнхэнд ч хандан үг хэлсэн байна.
“Та нар намайг 23 жилийн турш “алахыг” оролдсон. Үүнд хэт анхаарал хандуулах нь утгагүй хэрэг. Энэ бол байдаг л юм. Португалд байгаа хүмүүс л үргэлж бидний талд, миний талд байсаар ирсэн. Бусад нь бол хог. Гэхдээ энэ одоо хамаагүй. Би амьдралдаа юугаар ч дутаагүй. Бурхан надад бүгдийг, бүр төсөөлж байснаас ч илүүг өгсөн. Нас ахих тусам төлөвшиж, туршлага хуримтлуулдаг. Би над руу чиглэсэн дайралтуудад ч талархаж байна. Энэ л намайг илүү хүчирхэг болгосон. Үүний төлөө би сэтгүүлчид та бүхэнд талархаж байна” гэж Рональду мэдэгджээ.
Домогт карьерын сүүлчийн бүлэг
Криштиану Рональдугийн хувьд ДАШТ-ий цом нь түүний замналд үлдсэн цөөн том хоосон орон зайн нэг гэж олон хүн үздэг. Гэвч тэрбээр өөрөө энэ цомыг хүртсэн эсэхээс үл хамааран карьерынхаа үнэ цэнэ өөрчлөгдөхгүй гэдгийг онцоллоо.
Португал Испанийн эсрэг тоглолтод ямар үр дүн үзүүлэхээс шалтгаалан Рональдугийн олон улсын хөл бөмбөгийн замнал шууд өндөрлөж ч магадгүй, эсвэл дахин хэдэн өдөр үргэлжилж ч магадгүй. Гэхдээ нэг зүйл тодорхой байна. Энэ ДАШТ бол Криштиану Рональдугийн дэлхийн аваргын тайзан дээрх сүүлчийн бүжиг юм.
