Хиймэл оюун ухаанд асар их мөнгө зарцуулж буй компани орон тоогоо танана
АНУ-ын Meta компани хиймэл оюун ухааны салбарт хийж буй асар их хөрөнгө оруулалтын зардлаа тэнцвэржүүлэх хүрээнд 8000 ажилтнаа, өөрөөр хэлбэл нийт ажиллах хүчнийхээ 10 хувийг цомхотгохоор болжээ.
Тус компани зөвхөн энэ онд л гэхэд хиймэл оюун ухааны технологид нийт 135 тэрбум ам.доллар зарцуулахаар төлөвлөж байгаа аж. Энэ нь өмнөх гурван жилийн хугацаанд хийсэн нийт хөрөнгө оруулалттай нь дүйцэх хэмжээний дүн болж байна.
Mark Zuckerberg AI нэг хүний ажлын чадварыг эрс өсгөж байна гэж үзжээ
Meta-гийн үүсгэн байгуулагч, гүйцэтгэх захирал Mark Zuckerberg өмнө нь хиймэл оюун ухааны тусламжтайгаар ажилтнуудын бүтээмж эрс өсөж байгааг онцолж байсан. Түүний хэлснээр, урьд нь бүтэн багийн хүч шаарддаг байсан зарим төслийг одоо ердөө ганцхан ажилтан хэрэгжүүлэх боломжтой болсон байна.
Ийм өөрчлөлтийн улмаас компаниуд хүний нөөцийн бүтцээ дахин тооцоолж, орон тооны цомхотгол руу илүү хүчтэй шилжиж эхэлжээ.
Зөвхөн Meta биш, технологийн аваргууд ч цомхотгол хийж байна
Энэ онд хиймэл оюун ухаанд асар их хэмжээний хөрөнгө чиглүүлж эхэлсэнтэй холбоотойгоор олон технологийн компани ажилтнуудаа цомхотгох шийдвэр гаргаад байна.
Тухайлбал:
- Amazon — 30 мянган ажилтан
- Oracle — 10 мянга гаруй ажилтан
- Block — 4000 ажилтан
Ингэснээр AI-ийн өрсөлдөөн зөвхөн шинэ технологи хөгжүүлэх уралдаан байхаа больж, ажлын байр, компанийн бүтцэд том өөрчлөлт авчирч эхэлсэн нь улам тодорхой болж байна.
