Тайланд улсад зохион байгуулагдаж буй “Miss Grand International 2026” тэмцээнд Монгол Улсыг төлөөлөн 24 настай Хятадын Amber Yuhan оролцож байгаа нь олон нийтийн сүлжээнд маргаан, шүүмжлэл дагуулаад байна.
Түүнийг Монголын төрийн далбаа болон улсын нэрийн дор тэмцээнд оролцож байгааг цахим хэрэглэгчид анзаарч, Монгол Улсыг ямар үндэслэлээр төлөөлөх эрх авсан талаар асуулт тавьж эхэлжээ.
Монголд үндэсний шалгаруулалт зохион байгуулдаггүй
Эх сурвалжид дурдсанаар Монгол Улсад “Miss Grand International”-ийн үндэсний шалгаруулалт тогтмол зохион байгуулагддаггүй байна.
Үүний улмаас Монголыг төлөөлөх лиценз, эрхийг гадаадын загварын агентлаг эзэмшдэг бөгөөд тухайн агентлаг өөрийн харьяаны моделиудаас Монгол Улсын нэр дээр төлөөлөгч томилон оролцуулдаг аж.
Ийм зохицуулалтын хүрээнд Amber Yuhan энэ жилийн тэмцээнд Монгол Улсын төлөөлөгчөөр оролцож байгаа гэж мэдээлжээ.
2022 онд ч гадаадын оролцогч Монголын нэрээр оролцож байжээ
Энэ нь анхны тохиолдол биш гэж эх сурвалж онцолсон байна.
2022 онд мөн Якут гаралтай бүсгүй дээрхтэй төстэй журмаар Монгол Улсын нэрийн өмнөөс тэмцээнд оролцож байсан гэжээ.
Иймээс олон нийтийн дунд Монгол Улсын нэр, төрийн далбаа болон үндэсний төлөөллийн эрхийг олон улсын гоо бүсгүйн тэмцээнд ямар шалгуур, зөвшөөрлийн үндсэн дээр ашиглаж байгаа талаар дахин хэлэлцүүлэг өрнөж байна.
Amber Yuhan өөрийгөө Хятад болон Монголын мисс гэж танилцуулжээ
Монголыг төлөөлөн оролцож буй Amber Yuhan өөрийн цахим хуудсанд өөрийгөө “БНХАУ болон Монгол Улсын мисс” хэмээн танилцуулсан байна.
Энэ мэдээлэл ч мөн хэрэглэгчдийн анхаарлыг татаж, Монголын нэрийн өмнөөс гадаадын иргэн олон улсын тэмцээнд оролцож буй асуудлыг улам ихээр хэлэлцэхэд хүргэжээ.
Одоогоор Монголын холбогдох байгууллагууд уг төлөөллийн эрх болон лицензийн зохицуулалтын талаар албан ёсны дэлгэрэнгүй тайлбар өгсөн эсэх мэдээлэл нийтлэлд дурдагдаагүй байна.
Манайд хөөрхөн, чадвартай охид зөндөө л байна шүү дээ
Зохион байгуулагчид нь ямар учиртай ийм шийдвэр гаргасныг тайлбарлах хэрэгтэй