АНУ-ын Орегон мужийн Макминнвилл хотын нисэх буудлын ойролцоо хоёр нисдэг тэрэг агаарт мөргөлдөж, гурван хүн амиа алдсан байна. Ослын талаар Ямхилл тойргийн шерифийн алба мэдээлжээ.
Дуудлага авсан аврах багийнхан хэргийн газарт очиход нисдэг тэрэгнүүд Макминнвилл хотын нисэх буудлын ойролцоох хувийн фермийн талбайд унасан байжээ.
Нэг нисдэг тэргэнд хоёр хүн зорчиж явжээ
Осолдсон нисдэг тэрэгний нэгэнд хоёр хүн байсан байна. Тэдний нэг нь Техас мужийн нислэгийн багш, 22 настай Мэдди Аасбо байсан бол нөгөө нь Их Британийн иргэн, нисгэгчийн дадлагажигч байжээ.
Ямхилл тойргийн шериф Сэм Эллиотт пүрэв гарагийн орой болсон хэвлэлийн хурлын үеэр энэ талаар мэдээлсэн байна. Дадлагажигчийн нэрийг ар гэрийнхэнд нь албан ёсоор мэдэгдсэний дараа олон нийтэд зарлахаар болсон аж.
Харин нөгөө нисдэг тэргэнд зөвхөн нисгэгч нь явж байжээ. Түүнийг Орегон мужийн Ньюберг хотын оршин суугч, 38 настай Тайлер Стурдевант болохыг тогтоосон байна.
Ослын шалтгааныг шалгаж байна
Мөргөлдөөн орон нутгийн цагаар 14:15 орчимд болсон бөгөөд ослын шалтгааныг АНУ-ын Үндэсний тээврийн аюулгүй байдлын зөвлөл шалгаж эхэлжээ.
Мөн Холбооны нисэхийн захиргаа мөрдөн шалгах ажиллагаанд оролцож байгааг мэдээлсэн байна.
Ослод Robinson R-22 болон Airbus AS350 загварын хоёр нисдэг тэрэг өртжээ.
Тэдгээрийн нэгийг хувийн нислэгийн сургалт зохион байгуулж, нисдэг тэрэг түрээслүүлдэг Jerry Trimble Helicopters компани ашиглаж байсан байна. Тус компани ослын дараа холбогдох байгууллагуудтай хамтран мөрдөн шалгах ажиллагаанд оролцож байгаагаа мэдэгджээ.
Одоогоор нисдэг тэрэгнүүд ямар нөхцөлд агаарт мөргөлдсөн, техникийн гэмтэл болон хүний хүчин зүйл нөлөөлсөн эсэх талаар албан ёсны дүгнэлт гараагүй байна.
