Интермед IUHW эмнэлэг Японы Canon Medical Systems компанийн Aquilion ONE / INSIGHT Edition 640 зүслэгт шинэ үеийн компьютерт томографи төхөөрөмжийг Монгол Улсад анх удаа суурилуулж, оношилгоонд ашиглаж эхэлжээ.
Интермед эмнэлэг Японы IUHW групптэй хэрэгжүүлж буй стратегийн хамтын ажиллагааныхаа хүрээнд тус улсын эмнэлгийн дэвшилтэт технологи, олон улсын стандарт, мэргэжлийн туршлагыг Монголд нутагшуулах зорилт тавин ажиллаж байгаа аж.
Шинээр нэвтрүүлсэн CT төхөөрөмж нь зүрх судас, тархи мэдрэл, уушги, хэвлийн эрхтэн, хавдар болон яаралтай тусламжийн үеийн дүрс оношилгооны боломжийг нэмэгдүүлэх зориулалттай.
Зүрхийг нэг цохилтын хугацаанд бүхэлд нь дүрслэх боломжтой
Aquilion ONE / INSIGHT Edition төхөөрөмж нь 0.24 секундэд нэг бүтэн эргэлт хийж, 16 см хүртэлх хэсгийг нэг удаагийн дүрслэлээр хамрах хүчин чадалтай.
Ингэснээр зүрхийг нэг цохилтын хугацаанд бүхэлд нь дүрслэх боломж бүрдэж, титэм судасны нарийсал, шохойжилт болон бусад өөрчлөлтийг илүү нарийвчлан үнэлэхэд ашиглах боломжтой гэж эмнэлгээс мэдээлжээ.
Шинжилгээний хугацаа богиноссоноор өвчтөн удаан хугацаанд хөдөлгөөнгүй хэвтэх, амьсгалаа удаан түгжих шаардлага ч багасах юм. Энэ нь бага насны хүүхэд, өндөр настай хүн болон биеийн байдал хүнд өвчтөнүүдэд илүү тохиромжтой нөхцөл бүрдүүлэх давуу талтай.
Мөн төхөөрөмжийн 80 см-ийн өргөн нээлхий нь давчуу орчинд тавгүйтдэг, хөдөлгөөний хязгаарлалттай болон биеийн хэмжээ том хүмүүст шинжилгээнд арай тухтай хамрагдах боломж олгоно.
AI-д суурилсан дүрс боловсруулалтын технологи ашиглана
Шинэ төхөөрөмжид PIQE хиймэл оюунд суурилсан дүрс боловсруулах технологи ашиглаж байгаа бөгөөд энэ нь дүрсний сарнилт, шуугианыг багасган эд эрхтний бүтцийг илүү тод харахад тусалдаг байна.
Интермед эмнэлгийн мэдээлснээр шинэ технологи нь өмнөх үеийн CT төхөөрөмжтэй харьцуулахад шаардлагатай дүрсний чанарыг хадгалах нөхцөлд цацрагийн тунг тодорхой шинжилгээнд 80 хүртэл хувиар бууруулах боломжтой аж. Гэхдээ бодит цацрагийн хэмжээ нь шинжилгээний төрөл, өвчтөний биеийн онцлог болон ашиглаж буй протоколоос шалтгаалан өөр байна.
Шинэ тоног төхөөрөмжийг бүрэн хүчин чадлаар ашиглахын тулд эмч, технологич, инженер техникийн ажилтнуудын ур чадвар ч чухал. Энэ хүрээнд төхөөрөмж дээр ажиллах мэргэжилтнүүд Японы Нарита хотод мэргэжлийн сургалтад хамрагдаж, тоног төхөөрөмжийн ажиллагаа болон оношилгооны аргачлалын чиглэлээр мэдлэгээ дээшлүүлжээ.
Интермедийн зүгээс энэхүү хөрөнгө оруулалтыг зөвхөн шинэ тоног төхөөрөмж суурилуулсан явдал бус, дэвшилтэт технологийг мэргэжлийн хүний нөөцтэй хослуулан Монголд илүү хурдан, нарийвчилсан дүрс оношилгоо хийх нөхцөлийг бүрдүүлсэн алхам гэж онцолж байна.
Шинэ CT төхөөрөмжийг ашиглалтад оруулснаар зүрх судас, тархи мэдрэл, уушги, хавдар болон яаралтай тусламжийн үед шаардлагатай дүрс оношилгоог богино хугацаанд, өндөр нягтаршилтайгаар хийх боломж нэмэгдэх юм.
