“Pro” театрын уран бүтээлчид Оросын алдарт зохиолч Александр Вампиловын “Нугасны ан” жүжгээс сэдэвлэн бүтээсэн “Сүүлчийн бороо” нэртэй мета драмын тайзны бүтээлээр үзэгчидтэй уулзаж байна. Тус жүжиг өнөөдрийг хүртэл Оросын шинжлэх ухаан, соёлын төвд (РЦНК) амжилттай тоглогдож байгаа бөгөөд энэ сарын 25, 26, 27-ны өдрүүдэд хаалтын тоглолтуудаа хийнэ.
“Сүүлчийн бороо” бүтээл нь хүний сэтгэл зүй, амьдралын утга учир, найз нөхдийн харилцаа, хайр дурлал болон хувь хүний дотоод зөрчлийн тухай гүн гүнзгий өгүүлдэг. Үзэгчдийг өөрсдийн амьдрал, сонголтод эргэн нэг харахад хүргэдэг уянгын, философийн драм юм.
Тайзны бүтээлийг найруулагч Б.Анхбаатар найруулсан бөгөөд гол дүрүүдэд З.Булган, Б.Билгүүн, Б.Даваасүрэн, М.Лхагва, Э.Буд-Эрдэнэ, Э.Сүмбэ, Г.Анузул, Д.Цолмон, Т.Тэгш-Алдар нар тоглож байна.
Хаалтын тоглолтууд ойртож буй энэ үед жүжгийн үзвэрт хамрагдаж амжаагүй үзэгчдийг урьж байна. Тоглолтын хуваарь, тасалбарын мэдээллийг “Pro” театрын албан ёсны сувгуудаар авах боломжтой.
