АНУ-ын Миссури мужийн Сент-Луис хотын эмч нар толгой хэсгээрээ нийлж төрсөн Этиопын хоёр настай ихэр охидыг амжилттай салгажээ. Хияб, Вухбто нарын эмчилгээ хэдэн сарын турш үргэлжилж, нийт зургаан удаагийн нарийн төвөгтэй мэс засал хийсэн байна.
Охид краниопаг буюу гавлын ясаараа нийлсэн ихрүүд байсан бөгөөд 2026 оны хоёрдугаар сард салгах эцсийн хагалгаанд оржээ. Уг мэс засал бараг 25 цаг үргэлжилсэн байна.
Цусны судсыг дөрвөн үе шаттайгаар салгажээ
Ихрүүдийн гавлын ясны орчимд хамтран ашиглаж байсан өргөн венийн судасны сүлжээ байсан нь эмч нарын өмнө тулгарсан хамгийн том хүндрэлүүдийн нэг болжээ.
Тиймээс судсуудыг нэг удаагийн хагалгаагаар шууд салгахын оронд дөрвөн үе шаттайгаар аажмаар тусгаарласан байна. Ингэснээр охидын цусны эргэлтийн тогтолцоо бие даан ажиллах нөхцөлд үе шаттайгаар дасан зохицох боломж бүрджээ.
Мөн өмнөх хагалгаануудын үеэр авсан гавлын ясны хэсгүүдийг эмч нар хадгалж, эцсийн салгах мэс заслын дараа гавлын ясыг нөхөн сэргээхэд дахин ашигласан байна.
Одоо нөхөн сэргээх эмчилгээ хийлгэж байна
Хияб, Вухбто нар 2025 онд Этиопын Мекеле хотоос АНУ-д эмчилгээ хийлгэхээр очжээ.
Амжилттай салгасны дараа хоёр охин нөхөн сэргээх эмчилгээгээ үргэлжлүүлж байгаа бөгөөд эмч нарын мэдээлснээр биеийн байдал нь сайжирч, сэргээн засах эмчилгээний явцад ахиц гарч байна.
Олон үе шаттай бэлтгэл, олон цаг үргэлжилсэн эцсийн мэс заслын үр дүнд ихрүүд одоо тусдаа амьдралаа эхлүүлэх боломжтой болжээ.
Зургаан удаагийн хүнд хагалгааг давж гарсан гээд бодохоор үнэхээр агуу юм аа