2025 оны зургаадугаар сарын 7-ны өдөр, үд дунд Өвөрхангай аймгийн Хархорин суманд бага насны хүүхэд автомашинд дайруулж, улмаар эмнэлэгт нас барсан харамсалтай хэрэг гарсан талаар Цагдаагийн Ерөнхий Газраас мэдээллээ.
Тухайн өдөр 12:00 цагийн орчимд “Хашааны гадна талд хүүхэд автомашинд мөргүүлсэн” тухай дуудлага цагдаагийн байгууллагад иржээ. Хэрэгт жолооны үнэмлэхгүй иргэн М Toyota Prius-30 загварын автомашин жолоодож байхдаа урагш хөдөлж, нэг настай хүүхдийг мөргөсөн байна.
Гэмтэл авсан хүүхдийг яаралтай эмнэлэгт хүргэсэн ч эмчилгээний явцад харамсалтайгаар амь насаа алдсан байна. Хэргийг одоогоор Хархорин сумын цагдаагийн газар үргэлжлүүлэн шалгаж байгаа юм.
Цагдаагийн байгууллагаас дараах анхааруулгыг өгч байна:
- Жолооны эрхгүй бол тээврийн хэрэгсэл жолоодох хатуу хориотой
- Машин жолоодохоосоо өмнө ойр орчныхоо аюулгүй байдлыг нягтлах
- Бага насны хүүхдийг тээврийн хэрэгслийн орчимд сайтар харгалзах
- Эцэг эх, асран хамгаалагч нар хүүхдээ автомашины орчинд тоглуулахгүй байх
Цагдаагийн Ерөнхий Газраас иргэдийг тээврийн хэрэгсэл жолоодохдоо өндөр хариуцлагатай байж, хүүхдүүдийн амь нас, аюулгүй байдлыг хамгаалахад онцгойлон анхаарахыг уриалж байна.
