Хятадын Ганьсу мужийн Тяньшуй хотод байрлах “Хэши Пэйсин” цэцэрлэгийн эзэн болон таван ажилтан 200 гаруй хүүхэд, ажилтныг хар тугалгад хордуулсан хэрэгт ял сонсжээ.
Тус цэцэрлэгийг ажиллуулж байсан Ли Хуйфан хортой, аюултай хүнс үйлдвэрлэж, худалдаалсан хэрэгт буруутай гэж үзэгдэн бүх насаар хорих ял авсан байна. Мөн түүний 500 мянган юаньтай тэнцэх хувийн хөрөнгийг хураах шийдвэр гаргажээ.
Хэрэг 2025 оны долдугаар сард хүүхдүүд олноор өвдөж эхэлснээр ил болсон юм. Шинжилгээгээр тус цэцэрлэгийн 247 хүүхэд, ажилтны цусан дахь хар тугалгын хэмжээ хэвийн түвшнээс хэтэрсэн нь тогтоогдсон байна.
Хоолыг “гоё харагдуулахын” тулд хүнсний бус будаг ашиглажээ
Мөрдөн шалгалтаар цэцэрлэгийн гал тогооны ажилтнууд хоолыг илүү өнгөлөг, хүүхдийн сонирхол татахуйц харагдуулахын тулд хүнсэнд хэрэглэхийг хориглосон будаг ашиглаж байсан нь тогтоогджээ.
Будагны савлагаан дээр хүнсний зориулалтаар ашиглахыг хориглосон тэмдэглэгээ байсаар атал түүнийг үл тоомсорлосон байна.
Шүүхээс цэцэрлэгийн гүйцэтгэх захирал Жи Жинлинд 15 жилийн хорих ял оноож, 300 мянган юаниар торгожээ. Харин гал тогоонд ажиллаж байсан дөрвөн ажилтанд тус бүр зургаагаас найман жилийн хорих ял оноосон байна.
Шүүхийн дүгнэлтээр эдгээр ажилтан Ли Хуйфан болон Жи Жинлин нарын өгсөн чиглэлийн дагуу хүүхэд, ажилтнуудад зориулсан хүнсэнд аюултай бодис хольсон гэж үзжээ.
Дараа нь хийсэн лабораторийн шинжилгээгээр зарим хоолны дээжид агуулагдах хар тугалгын хэмжээ Хятадын хүнсний аюулгүй байдлын үндэсний стандартаас 2000 хүртэл дахин өндөр байсан нь тогтоогдсон байна.
235 хүүхэд эмнэлгийн тусламж авахад хүрчээ
Хэргийг мөрдөн шалгах гол шалтгаан болсон тохиолдолд 235 хүүхэд улаан чавгатай жигнэсэн бялуу болон зайдастай эрдэнэ шишийн ороомог идсэний дараа хар тугалгын хордлогын шинж тэмдэг илэрч, эмнэлгийн тусламж авчээ.
Шинжилгээгээр улаан чавгатай бялуунд хар тугалгын хэмжээ 1052 мг/кг, зайдастай эрдэнэ шишийн ороомогт 1340 мг/кг байсан байна. Харин үндэсний стандартын зөвшөөрөгдөх дээд хэмжээ 0.5 мг/кг байжээ.
Хар тугалгын хордлого нь бага насны хүүхдэд онцгой аюултай бөгөөд тархи, төв мэдрэлийн тогтолцоонд ноцтой гэмтэл учруулах эрсдэлтэй.
Хэргийг цааш шалгах явцад орон нутгийн зарим албан тушаалтан болон эмнэлгийн ажилтан цусны шинжилгээний үр дүнг өөрчилсөн, цэцэрлэгийн хөрөнгө оруулагчаас хахууль авсан, болсон явдлыг нуухыг оролдсон гэх нөхцөлүүд ч илэрчээ.
Энэ хэргийн дараа Хятад улс цэцэрлэг, сургуулийн хоол хүнсний нийлүүлэлттэй холбоотой үндэсний журмаа чангатгасан байна.
Шинэ шаардлагын хүрээнд шинээр нийлүүлэгдэж буй хүнсний багц бүрийг шинжилгээнд хамруулах, гурил, будаа, хүнсний тос зэрэг үндсэн бүтээгдэхүүнийг зөвхөн төвлөрсөн, хяналттай худалдааны цэгээс худалдан авах зэрэг арга хэмжээ багтжээ.
Ийнхүү хүүхдийн хоолны өнгө үзэмжийг нэмэгдүүлэхийн тулд хүнсний бус будаг хэрэглэсэн үйлдэл олон зуун хүүхдийн эрүүл мэндэд хохирол учруулж, цэцэрлэгийн эзэнд бүх насаар хоригдох ял оноох хэмжээнд хүрсэн байна.
