Олон улсын аялалд нисэх буудлын тав тух, хурд, хотын төвтэй холбогдох боломж зорчигчдын сонголтод улам чухал болж байна. Зарим аялагч татваргүй дэлгүүр, худалдааны бүсийг сонирхдог бол нөгөө хэсэг нь хотын төвд хэр хурдан хүрэх, дамжин суухад хялбар эсэх, хэдэн чиглэлд нислэг үйлддэгийг илүү чухалчилдаг.
Эдгээр болон бусад олон үзүүлэлтийг харгалзан Consumer Choice Center байгууллага 2026 оны “World Consumer Airport Index” чансаагаа танилцуулжээ. Шинэ жагсаалтад Европ, Ази, Америк болон Ойрх Дорнодын томоохон нисэх буудлууд багтсан байна.
Нисэх буудлуудыг ямар шалгуураар үнэлсэн бэ?
Чансааг гаргахдаа зөвхөн зорчигчдын тоо эсвэл нислэгийн чиглэлийн тоог харгалзаагүй байна.
Нисэх буудал метро, төмөр замын сүлжээнд шууд холбогдсон эсэх, терминалуудын хооронд шилжихэд хэр хялбар, дамжин суух үед хүндрэл гардаг эсэх, цуцлагдсан нислэгийн хэмжээ болон ойролцоо зочид буудлын боломж зэргийг үнэлжээ.
Үүнээс гадна шөнийн нислэгийн боломж болон хил, гаалийн шалгалтыг хэр хурдан нэвтрэх зэрэг үзүүлэлт нэмэлт оноонд нөлөөлсөн байна.
Барселонагийн нисэх буудал нэгдүгээр байрт оржээ
2026 оны жагсаалтыг Испанийн “Barcelona-El Prat Josep Tarradellas” нисэх буудал тэргүүлсэн байна.
Эх сурвалжид дурдсанаар тус нисэх буудлын нэг давуу тал нь зорчигчдын хүлээлгийн хугацаа богино байсанд оржээ. Тухайлбал зарим шалгалтын үеийн дараалалд дунджаар гурван минут орчим зарцуулсан гэж мэдээлсэн байна.
Ромын “Фьюмичино” нисэх буудал хоёрдугаарт, АНУ-ын Лос Анжелесийн олон улсын нисэх буудал гуравдугаар байрт орсон нь энэ жилийн жагсаалтын сонирхолтой үр дүн болжээ.
2026 оны дэлхийн шилдэг 10 нисэх буудал
- “Barcelona-El Prat Josep Tarradellas” — Барселона, Испани
- “Leonardo da Vinci–Fiumicino” — Ром, Итали
- Лос Анжелесийн олон улсын нисэх буудал — АНУ
- “Suvarnabhumi” олон улсын нисэх буудал — Бангкок, Тайланд
- “Charles de Gaulle” нисэх буудал — Парис, Франц
- “King Abdulaziz” олон улсын нисэх буудал — Жидда, Саудын Араб
- “London Heathrow” — Их Британи
- “Adolfo Suárez Madrid–Barajas” — Мадрид, Испани
- “Haneda” олон улсын нисэх буудал — Токио, Япон
- Дубайн олон улсын нисэх буудал — Арабын Нэгдсэн Эмират
Зарим том нисэх буудал сул үнэлгээ авчээ
Харин жагсаалтын нөгөө талд зорчигчдод илүү төвөгтэй гэж үнэлэгдсэн нисэх буудлууд ч багтсан байна.
Эх сурвалжид Анталья, Гуанжөү Байюнь болон Франкфуртын нисэх буудлууд харьцангуй сул үнэлгээ авсныг дурджээ.
Үүнд хотын төвөөс хол байрладаг байдал, такси болон тээврийн үйлчилгээний хүртээмж, хил нэвтрэхэд зарцуулах хугацаа зэрэг хүчин зүйл нөлөөлсөн гэж тайлбарласан байна.
Тав тухаас гадна цаг хэмнэх боломж хамгийн чухал болж байна
Шинэ чансаанаас харахад орчин үеийн зорчигчид зөвхөн том, тансаг терминал бус хурдан үйлчилгээ, хоттой сайн холбогдсон нийтийн тээвэр болон дамжин суухад ойлгомжтой зохион байгуулалтыг илүү үнэлдэг болжээ.
Тиймээс нисэх буудлын “шилдэг” гэсэн үнэлгээ нь зөвхөн архитектур, дэлгүүр, үйлчилгээний тоогоор бус зорчигчид хэр бага хугацаа, хүндрэлтэйгээр аяллаа үргэлжлүүлж чадаж байгаагаар хэмжигдэх хандлага улам хүчтэй болж байна.
