“Blackpink” хамтлагийн гишүүн Лиза Netflix-ийн шинэ хөгжмийн баримтат цуврал “Hitmakers”-т оролцож буйг тус платформ албан ёсоор зарлалаа. Зургаан ангитай энэхүү цуврал нь 2025 оны долдугаар сарын 24-нд нээлтээ хийх бөгөөд дэлхийн шилдэг дуу бичлэгийн уран бүтээлчид хамтран ажиллаж, цоо шинэ уран бүтээл төрүүлэхээр зорьж байна.
Цувралд оролцож буй уран бүтээлчдийн дунд John Legend, Shaboozey болон Лиза багтаж буй. Уран бүтээлч бүр энэхүү цувралын хүрээнд шинэхэн, оригинал бүтээл туурвих бөгөөд Лизагийн шинэ дуу ч цацагдах юм. Трейлерт түүний дүр хэдий богино хугацаанд гарсан ч харц булаам, “үсэрч буй эрч хүч” гэж тодотгогдох сэтгэл татам байдлаар онцлогджээ.
Лиза зөвхөн дуучин, бүжигчин биш харин жүжигчний ур чадвараа ч энэ онд харуулсан. Тэрээр HBO-ийн нэр хүндтэй “The White Lotus” цувралын гуравдугаар улиралд Мук (Mook) гэх дүрд тоглон, дэлгэцийн уран бүтээлд анх удаа хөл тавьсан нь шүүмжлэгчдийн зүгээс ч, фэнүүдийн зүгээс ч өндөр үнэлгээ авсан билээ.
Түүний Netflix болон HBO-гийн бүтээлд зэрэг оролцож буй нь уран бүтээлийн олон талт байдал, олон улсын тавцанд өсөж буй байр суурийг дахин баталж байна.
