АНУ-ын Нью Йорк мужид MRI төхөөрөмж ажиллаж байсан өрөөнд хүзүүндээ металл гинж зүүсэн 61 настай эрэгтэй санамсаргүйгээр орсны улмаас ноцтой гэмтэл авсан хэрэг гарч, тус хэргийг холбогдох байгууллагууд шалгаж эхэлжээ.
Энэхүү осол нь Нассау дүүргийн “Nassau Open MRI” төвд энэ долоо хоногийн Лхагва гарагт болжээ. Эрэгтэй MRI аппарат ажиллаж байсан өрөөнд зөвшөөрөлгүйгээр нэвтэрсэн бөгөөд тэр үед хүзүүндээ зүүсэн том металл гинж нь машины хүчтэй соронзон оронд татагдан, ослын гол шалтгаан болсон байна.
Цагдаагийн газрын мэдээлснээр, тухайн хүний биеийн байдал одоогоор хүнд байгаа бөгөөд эмнэлгийн хяналтад байна. Ослын шалтгаан, тухайн хүн хэрхэн хамгаалалтын дэглэмийг зөрчин өрөөнд нэвтэрсэн талаар мөрдөн шалгах ажиллагаа үргэлжилж байгаа аж.
MRI төхөөрөмжийн аюулгүй байдал
АНУ-ын Био анагаахын дүрслэл, Био инженерчлэлийн Үндэсний Хүрээлэн-гийн тайлбарласнаар MRI аппарат нь асар хүчтэй соронзон орон ашигладаг ба энэ нь металл, соронзлогдох чадвартай бүх төрлийн зүйлд маш хүчтэй таталцдаг. Зарим тохиолдолд ийм орчинд байгаа тэргэнцэр зэрэг тоног төхөөрөмж агаарт сум шиг хөөрөх аюултай байдаг гэнэ.
Сэрэмжлүүлэг
Энэхүү харамсалтай осол нь MRI төхөөрөмжийн ойролцоо байхдаа аюулгүйн дэглэм чанд сахих шаардлагатайг сануулж байна. Ялангуяа металл эдлэл, үнэт эдлэл, гинж зэргийг MRI өрөөнд орохоос өмнө заавал тайлах шаардлагатай юм.
