Мьянмарын төв хэсэгт болсон аймшигт халдлагын улмаас олон энгийн иргэн амиа алджээ. Орон нутгийн цагаар Даваа гарагт, тус улсын цэргийн хунта Чаун У хороололд болсон үндэсний баярын арга хэмжээний үеэр шүхэрнээс хоёр тэсрэх бөмбөг хаясны улмаас 24 хүн нас барж, 47 хүн шархадсан талаар BBC мэдээллээ.
Цэргийн халдлага олон хүний аминд хүрэв
Халдлага болсон үед талбайд 100 гаруй хүн баяр тэмдэглэж байсан бөгөөд бөмбөг дэлбэрэхэд олон хүн газар дээрээ нас барсан байна. Гэрчүүдийн хэлснээр, “бүх зүйл ердөө долоон минутын дотор болсон” бөгөөд дэлбэрэлтийн дараа талбай аймшигт дүр зурагтай болсон гэжээ.
Сагаинг мужийн энэ бүс нутаг нь 2021 онд хунта засгийн эрхэнд гарснаас хойш зэвсэгт мөргөлдөөний гол талбар болсон юм. Тус бүсийн ихэнх хэсэгт төрийн эргэлтийн дараа байгуулагдсан сайн дурын эсэргүүцлийн бүлгүүд хяналтаа тогтоосон байдаг.
Тэд халдлагын талаар урьдчилан анхааруулга авч, олныг тараах гэж оролдсон ч бөмбөг хаялт бодсоноос эрт болж, олон хүний амийг авч оджээ.
Хүн хүч, техник хомсдолд орсон хунта шүхэр ашиглаж байна
Мьянмарын цэргийн хүчнийхэн сүүлийн саруудад нисэх онгоц, нисдэг тэрэгний хомсдолд орсон тул агаарын довтолгоонд шүхэр ашиглах тактик түлхүү хэрэглэх болжээ. Олон улсын хориг арга хэмжээний улмаас тус улс зэвсэг, тоног төхөөрөмж худалдан авахад хүндрэлтэй байгаа ч Хятад болон Оросоос нийлүүлж буй нисгэгчгүй онгоц, технологи нь тэдэнд тодорхой давуу тал өгч байгаа гэж шинжээчид дүгнэв.
2021 оны цэргийн эргэлтээс хойш Мьянмарт зэвсэгт мөргөлдөөн тасраагүй бөгөөд хэдэн мянган хүн амиа алдаж, сая гаруй хүн орон гэрээ орхин дүрвэжээ.
