Мексикийн зүүн өмнөд хэсэгт өнгөрсөн пүрэв, баасан гарагт орсон тасралтгүй аадар бороо хүчтэй үер, хөрсний гулгалт үүсгэж, улмаар 41 хүн амиа алдан, 27 иргэн сураггүй болсон талаар орон нутгийн эрх баригчид мэдээллээ.
Их хэмжээний хохирол учруулсан байгалийн гамшиг
Үерийн гамшиг нь голчлон Идальго, Пуэбла, Веракрус мужуудад хамгийн хүндээр нөлөөлжээ. Урьдчилсан тооцоогоор:
- 34 мянга гаруй барилга, байшин сүйдсэн,
- Пуэбла мужид 80 мянга орчим хүн гамшигт өртсөн,
- Улсын хэмжээнд 320 мянга гаруй айл өрх цахилгаангүй болсон байна.
Аврах ажиллагаа үргэлжилж байна
Мексикийн Засгийн газар болон Ерөнхийлөгч Клаудиа Шейнбаумын шийдвэрийн дагуу үерийн голомтод 8700 гаруй аврах, эрэн хайх, зам сэргээх албан хаагчид ажиллаж байна.
Түүнчлэн Тэнгисийн цэргийн хүчнийхэн өчигдөрийн байдлаар 900 гаруй иргэнийг аюулгүй бүс рүү нүүлгэн шилжүүлж, түр хамгаалах байранд байршуулжээ.
Одоогоор сураггүй иргэдийг олох, цахилгааны хангамжийг сэргээх, эвдэрсэн дэд бүтцийг засварлах ажил үргэлжилж байгаа бөгөөд эрх баригчид байгалийн гамшгийн дараах сэргээн босголтыг яаралтай эхлүүлэхээр төлөвлөж байна.
