Монгол Улсад эрчим хүчний салбарын түүхэнд томоохон үйл явдал боллоо. Өнөөдөр нийслэлийн Засаг дарга бөгөөд Улаанбаатар хотын захирагч Х.Нямбаатар болон Хятадын хөрөнгө оруулалттай “Митайм Интернэйшнл” компанийн Ерөнхий захирал Тиан Хао Мин нар Дулааны тавдугаар цахилгаан станц (ДЦС-5)-ыг барих гэрээнд гарын үсэг зурлаа.
42 жилийн дараах шинэ бүтээн байгуулалт
Монгол Улсад хамгийн сүүлд өндөр хүчин чадлын Дулааны IV цахилгаан станц 1983 онд ашиглалтад орж байсан бол ийнхүү 42 жилийн дараа шинэ дулааны станц барих ажлыг албан ёсоор эхлүүлж байна. Төслийг төр, хувийн хэвшлийн түншлэлийн хүрээнд хэрэгжүүлэх бөгөөд энэ нь Монголын эрчим хүчний салбарт анхных юм.
Гэрээ үзэглэх ёслолын үеэр Х.Нямбаатар онцлохдоо:
“Энэхүү төсөл 1990 оноос хойш яригдсан ч олон шалтгааны улмаас хэрэгжиж чадаагүй. Эрчим хүчний хэрэглээ жил бүр 14 хувиар өсөж байгаа энэ үед Улаанбаатар хотын баруун хэсгийг найдвартай дулаан, цахилгаанаар хангах ДЦС-5 нь стратегийн чухал ач холбогдолтой төсөл юм”
гэж мэдэгджээ.
Төслийн үндсэн үзүүлэлтүүд
- Байршил: Баянгол дүүргийн 20-р хороо, хуучин ДЦС-2-ийн үнсэн сангийн 26 га талбай
- Хүчин чадал: 300 МВт цахилгаан, 340 Гкал дулаан
- Хугацаа: 2025–2028 он
- Нийт хөрөнгө оруулалт: 658.6 сая ам.доллар
- 80% — хувийн хэвшлийн хөрөнгө оруулалт
- 20% — нийслэлийн төсвийн санхүүжилт
Станц ашиглалтад орсноор Таван шар, Баянхошуу, Хилчин хотхон, 3, 4, 21 дүгээр хороолол зэрэг баруун бүсийн 40 мянга гаруй өрхийг дулаанаар, 100 мянга орчим өрх, аж ахуйн нэгжийг цахилгаанаар хангах боломжтой болно.
Орчин үеийн технологи, байгальд ээлтэй шийдэл
Шинэ станцад эргэлтэд буцлах үет шаталттай (CFB) технологи ашиглаж, жилд 2.2 тэрбум кВт.ц цахилгаан, 4.8 сая ГДж дулаан үйлдвэрлэх хүчин чадалтай байх юм. Утааны хийн шүүлтүүрийн системийн тусламжтайгаар агаар мандалд хаягдах хорт бодис, дэгдэмхий үнсийг 99.9 хувь хүртэл бууруулах нөхцөл бүрдэнэ.
Ажлын байр ба эдийн засгийн үр ашиг
Төслийн хэрэгжилтийн үеэр 1600 гаруй түр ажлын байр, ашиглалтад орсны дараа 369 байнгын ажлын байр шинээр бий болно. Энэхүү төсөл нь зөвхөн нийслэлийн эрчим хүчний ачааллыг бууруулаад зогсохгүй эрчим хүчний импортоос хараат байдлыг бууруулах, системийн найдвартай ажиллагааг нэмэгдүүлэх ач холбогдолтой юм.
Ирээдүйн дэд бүтцийн жишиг төсөл
ДЦС-5 нь Монгол Улсад төр, хувийн хэвшлийн түншлэлээр хэрэгжиж буй анхны томоохон эрчим хүчний төсөл бөгөөд цаашид нийслэлийн болон улсын дэд бүтцийн бусад төслүүдийг ижил хэлбэрээр хэрэгжүүлэх жишиг загвар болох төлөвтэй байна.
