“Silk Way Star” олон улсын шоуны тайзнаас түрүүлж, Азийг байлдан дагуулсан дуучин Ж.Мишээлийг Казахстаны төрөөс албан ёсоор шагнажээ. Түүнийг тус улсын найрамдлын II одонгоор шагнасан нь Монголын уран бүтээлчийн хувьд томоохон түүхэн үйл явдал болж байна.
Азийн 12 орны өрсөлдөөн дундаас тодорсон ялагч
Өнгөрсөн есдүгээр сараас эхэлж Азийн 12 орны шилдэг дуучид өрсөлдсөн “Silk Way Star” шоуны ялагчаар Монголын уран бүтээлч Ж.Мишээл тодорсон. Тэр зөвхөн шүүгчдийн үнэлгээгээр бус, үзэгчдийн дунд ч нэгэн зэрэг илт давуу байлаа.
Тэмцээний шүүгчдээс хамгийн өндөр оноо авахын сацуу 500 мянга гаруй хүн оролцсон цахим санал асуулгад Ж.Мишээл нэгдүгээр байраар тэргүүлж, үзэгчдийн хамгийн их дэмжсэн оролцогч болсон юм. “Silk Way Star”-ыг Казахстаны Jibek Joly TV сувгаас үйлдвэрлэн зохион байгуулсан бөгөөд төсөл нь бүс нутгийн хэмжээний дуу хөгжмийн томоохон мега шоуны нэгэнд тооцогдож байна.
Ерөнхийлөгчийн зөвлөхтэй хийсэн уулзалт ба төрийн одон
Шоуны оролцогчдыг өчигдөр Казахстаны Ерөнхийлөгчийн зөвлөх Эрлан Карин ёслолын журмаар хүлээн авч уулзжээ. Уулзалтад “Silk Way Star”-ын ялагч болон финалын шатанд оролцсон уран бүтээлчид уригдсан бөгөөд тэднийг бүс нутгийн соёлын харилцаанд оруулсан хувь нэмрийг нь өндрөөр үнэлж, төрийн түвшинд талархал илэрхийлсэн байна.
Хүлээн авалтын үеэр тэмцээний тэргүүн байрын эзэн Ж.Мишээлийг Казахстаны найрамдлын II одонгоор шагнасан нь онцгойлон тэмдэглэх үйл явдал болов. Энэ одон нь Казахстаны зүгээс улс хоорондын ойлголцол, соёлын гүүрийг бэхжүүлэхэд хувь нэмэр оруулсан хүмүүст олгодог нэр хүндтэй шагналын нэг юм.
Харин бусад оролцогч уран бүтээлчдэд Казахстаны Ерөнхийлөгч Касым-Жомарт Токаевын нэр дээрх талархлын захидлыг гардуулсан байна. Ингэснээр шоу нь зөвхөн телевизийн контент бус, улс хоорондын найрсаг харилцааны томоохон төслөөр үнэлэгдэж байгааг харууллаа.
Эрлан Карин төслийг дүгнэхдээ “Silk Way Star” шоуны талаар:
“Бүс нутгийн улс орнуудын нөхөрлөлийг бэхжүүлэхэд үнэтэй хувь нэмэр оруулсан”
хэмээн онцолж, дуу хөгжмөөр дамжсан соёлын солилцоо бодит үр дүн авчирч байгааг тэмдэглэсэн байна.
Ж.Мишээл: Казах хэл дээр уран бүтээл туурвина
Шоуны дараах хэвлэлийн уулзалтын үеэр Ж.Мишээл цаашдын уран бүтээлийнхээ нэг чухал чиглэлийг Казахстан, казах хэлтэй сонсогчидтой холбон ярьжээ. Тэрбээр оролцогчийн хувьд төдийгүй хүндэт зочны хувиар казах үзэгчдийн хайр, дэмжлэгийг хүлээснээ дурдаад, үүний хариуд тус улсын хэлээр дуу гаргахаар ажиллаж байгаагаа хуваалцсан байна.
Түүний хэлснээр:
“Казах хэл дээр дуу гаргахаар төлөвлөж байгаа. Энэ ард түмний соёл, хэл нь надад онцгой санагддаг. Тийм учраас казах хэлтэй иргэдэд зориулж уран бүтээл туурвих ажилдаа орсон”
хэмээн ярьжээ.
Ийнхүү “Silk Way Star”-ын ялагчийн амжилт зөвхөн тайзан дээрх үзүүлбэрээр дуусалгүй, хоёр улсын соёлын гүүр болж, Казахстаны төрийн одон, шинэ хэл дээрх дуу, цаашдын хамтын уран бүтээлээр үргэлжлэх нь тодорхой болж байна.
