АНУ-ын ерөнхийлөгч Дональд Трампын биеийн байдал муудаж, хөгшрөлттэй холбоотой ядаргаа, сульдлын шинж тэмдгүүд илэрч байгаа талаар New York Times мягмар гарагийн дугаартаа бичсэн нь Цагаан ордны тэргүүнийг ихээхэн бухимдууллаа.
Эрүүл мэндийн тухай нийтлэл Трампын уурыг бадраав
Эрүүл мэндийн байдлыг нь шүүмжилсэн нийтлэл гарсны дараа Трамп өчигдөр тус сониныг чиглэсэн дайралт хийж, нийтлэлийг бичсэн эмэгтэй сэтгүүлчийг өөрийнх нь хэвшмэл өнгө аясаар доромжилсон байна.
Тэр өөрийн сошиал хуудсанд:
“Би амьдралдаа хэзээ ч ийм шаргуу ажиллаж байгаагүй. Гэсэн хэдий ч удахгүй хаагдах Таймс сонины радикал зүүний солиотнууд эсрэгээрээ миний эрч хүч суларсан тухай мэдээ нийтэлсэн байна”
хэмээн бичжээ.
Одоогоор 79 настай Трамп энэ оны нэгдүгээр сард тангараг өргөх үедээ АНУ-ын түүхэнд хамгийн өндөр настай ерөнхийлөгч болсон. Тэр өчигдрийн мэдэгдэлдээ хөрөнгийн зах зээлийн өсөлт, гадаадын дайнуудыг зогсоохын төлөө хийсэн алхам зэрэг хоёр дахь бүрэн эрхийнхээ хугацаанд хэрэгжүүлсэн гол ажлуудаа нэрлэн тоочиж, өөрийгөө эрч хүчтэй хэвээр гэдгийг батлахыг оролдсон байна.
Мөн сүүлийн удаагийн эмнэлгийн үзлэгээрээ “Бие махбод болон сэтгэцийн эрүүл мэндийн төгс үнэлгээ” авсан хэмээн бахархалтайгаар онцолжээ.
Нийтлэл дэх мэдээлэл: багассан ачаалал, зүүрмэглэсэн мөч, нууцлаг MRI
New York Times сонины нийтлэлд Трампыг анхны бүрэн эрхийнхээ үеэс ялгаатайгаар олон нийтийн арга хэмжээнд оролцох давтамжаа мэдэгдэхүйц багасгасан, дотоод томилолтоор явах нь цөөрсөн, өдөр тутмын уулзалт, арга хэмжээг ихэвчлэн 12:00–17:00 цагийн хооронд төвлөрүүлэх болсон гэж бичжээ.
Мөн:
- Энэ сарын эхээр Цагаан ордны Зууван танхимд болсон хэвлэлийн хурлын үеэр Трамп хэсэг хугацаанд зүүрмэглэж буй мэт харагдсан,
- Өнгөрсөн аравдугаар сард тэр MRI шинжилгээ хийлгэсэн ч ямар шалтгаанаар орсноо олон нийтэд тайлбарлаагүй,
- Түүний хавагнасан шагай, хөхөрсөн гарын зураг хэвлэл, сошиалд цацагдаж, эрүүл мэндийнх нь талаар таамаг дэгдээсэн
гэх зэрэг баримтуудыг дурдсан байна.
Трампын дайралт: “жинхэнэ ард түмний дайсан” ба хувийн доромжлол
Трамп өчигдрийн мэдэгдэлдээ New York Times сониныг “жинхэнэ ард түмний дайсан” гэж тодорхойлон шүүмжилжээ. Тэрээр зөвхөн редакцийг шүүмжлээд зогсохгүй, нийтлэлийг бичсэн эмэгтэй сэтгүүлч рүү чиглэсэн хувийн дайралт хийж, түүнийг “дотор болон гадна аль аль талаасаа муухай хүн” гэж доромжилсон байна.
Энэ нь сэтгүүлчдийг бүрэн нэр устай нь дайрч, гутаан доромжилдог түүний урьдын хэв маяг дахин давтагдаж буй хэрэг. Энэ сарын эхээр ч Трамп өөр нэг эмэгтэй сэтгүүлчийг “гахай”, бас нэгийг нь “аймшигтай хүн” хэмээн хэл амаар дайрч байв.
New York Times: “Нэр цохин доромжлох нь биднийг айлгахгүй”
Трампын дайралтад New York Times өчигдөр хариу өгч, өөрсдийн нийтлэлийг:
“үнэн зөв баримт дээр үндэслэсэн”
хэмээн хамгаалжээ. Мөн тэд:
“Нэр цохон хувь хүнийг доромжлох нь манай ажилд нөлөөлөхгүй бөгөөд сэтгүүлчид маань иймэрхүү айлган сүрдүүлэх арга барилын өмнө энэ засаг захиргааны талаар мэдээ бичихээс айхгүй”
гэж мэдэгдсэн байна.
Ийнхүү Трампын нас, эрүүл мэндийн эргэн тойрон дахь эргэлзээ, асуулт улам нэмэгдэхийн зэрэгцээ, хэвлэл мэдээлэлтэй хийдэг түүний хурц ширүүн тулаан ойрын саруудад ч үргэлжлэх нь тодорхой боллоо.
