Арвайхээр сумын ерөнхий боловсролын 1 дүгээр сургуулийн “Болор-4” бүжгийн хамтлаг Монгол Улсын “Оны онцлох баг”-аар шалгарчээ.
“Болор-4” хамтлагийн бүрэлдэхүүн, чиглэл
Тус хамтлаг МУСТА, БТА Г.Энхсайханы удирдлага дор 20 хүүхдийн бүрэлдэхүүнтэйгээр ардын, цэнгээнт, орчин үеийн бүжгийн төрлөөр хичээллэдэг байна.
Энэ жилийн онцлох амжилтууд
“Болор-4” хамтлаг олон улсын хүүхдийн “Алтан гадас-2025” урлагийн их наадамд гран-при хүртсэн байна. Мөн ОХУ-ын Эрхүү хотод зохион байгуулсан “Агуу их цайны зам-2025” олон улсын тэмцээнд цомын эзэн болж, аймгийн Хөгжимт драмын түүхт 40 жилийн ойн хүрээнд болсон “Арвайн дэг-2025” аймгийн аварга шалгаруулах уралдааны хамтлаг бүжгийн төрөлд гран-при шагнал авсан гэж мэдээллээ.
“Оны онцлох хүүхэд” номинацын спортын төрөлд шалгарсан сурагч
“Оны онцлох хүүхэд” шалгаруулах номинацын биеийн тамир, спортын төрөлд Арвайхээр сумын ЕБ-ын 2 дугаар сургуулийн тусгай хэрэгцээт бүлгийн 12-р ангийн сурагч Б.Буянтогтох шалгарсан байна. Тэрбээр Польш улсад болсон дэлхийн цомын төлөөх тэмцээнд волейболоор дөрөвдүгээр байр эзэлж, Монголын хүүхдийн спортын 8 дугаар наадмын өвлийн спортын төрөлд цасны гуталтай гүйлтээр тэргүүн байр, Бочигийн 7 дугаар тэмцээнд гутгаар байр хүртжээ.
Шалгаруулалтын зорилго, зохион байгуулалт
Хүүхдийн төлөө үндэсний зөвлөл, ГБХНХЯ, Засгийн газрын хэрэгжүүлэгч агентлаг ХГБХХГ-аас хүүхдийн хөгжих, нийгмийн амьдралд оролцох боломж, гаргасан амжилт ололтыг алдаршуулах, нийгэмдээ үлгэр дуурайлал болгох зорилгоор “Оны онцлох хүүхэд”-ийг шалгаруулах ёслолыг 33 дахь жилдээ зохион байгуулсан байна.
