Лавровын мэдэгдлээс CIA-гийн эсрэг тайлан хүртэл
Энэ долоо хоногийн Даваа гарагт ОХУ-ын гадаад хэргийн сайд Сергей Лавров Украины нисгэгчгүй онгоцнууд ерөнхийлөгч Путиний өргөөнд халдсан тухай мэдэгдэл хийсэн.
Харин үүний араас АНУ-ын Тагнуулын Төв Газар (CIA) ийм халдлага өргөөнд чиглээгүй, өөр байг онилсон гэсэн дүгнэлтийг гаргасан байна. Лхагва гарагийн орой Америкийн Wall Street Journal зэрэг хэд хэдэн нэр хүндтэй хэвлэл Вашингтоны албаны эх сурвалжийг иш татан энэ талаар мэдээлжээ.
АНУ-ын анхны байр суурь ба Киевийн хариу
Эхэндээ АНУ-ын ерөнхийлөгч Дональд Трамп болсон үйл явдалд Украиныг буруутгасан өнгө аястай мэдэгдэл хийж байсан. Харин Киевийн эрх баригчид Оросын талын тайлбарыг эрс няцааж:
“дараагийн үйлдлээ зөвтгөх зорилгоор зохиомол халдлагын талаар ярьж байна”
хэмээн мэдэгдсэн байдаг.
Оросын эрх баригчид Лхагва гарагт анх удаа халдлага болсон гэх нотолгоо харуулна гэж мэдэгдэхдээ Украины унасан дроны гэрэл зургийг олон нийтэд үзүүлсэн.
CIA: Дронууд өргөөнөөс хол байгаа цэргийн объект руу чиглэсэн
АНУ-ын албаны эх сурвалжийн мэдээлснээр тухайн өдөр Украины нисгэгчгүй онгоцнууд үнэхээр Путиний өргөө байрладаг бүс нутагт халдлага хийсэн ч шууд өргөөг онилсонгүй, түүнээс хол зайд орших цэргийн байгууламж руу чиглэж байсан гэжээ.
Энэ дүгнэлтийг тагнуулын мэдээлэл, хиймэл дагуулын болон бусад сувгаар цуглуулсан өгөгдөлд тулгуурлан CIA-ийн мэргэжилтнүүд нарийвчлан шинжилсний дараа баталсан гэж эх сурвалжууд онцолж байна.
Лхагва гарагт ерөнхийлөгч Трамп уг тайланг CIA-ийн захирал Жон Рэтклиффээс хүлээн авсан тухай мэдээлэгджээ.
Трампын байр суурийн өөрчлөлт ба АНУ-ын хэвлэлийн байрлал
Тайланг хүлээн авсны дараа Трамп Оросын талыг шүүмжилсэн өнгө аястай New York Post сонины нийтлэлийг өөрийн сошиал хуудсанд хуваалцсан нь түүний байр суурь өөрчлөгдсөн байж болзошгүйг харуулж байна.
Тэр нийтлэлд Украины дайныг зогсоож, энх тайван тогтоох хамгийн том саад тотгор нь Путин өөрөө болж буйг онцлон бичиж, түүнийг огцом шүүмжилсэн байсан. Нийтлэлд:
“Путинийг чиглэсэн аливаа халдлага үндэслэлтэй юм. Түүний матрын нулимсанд хуурталгүй, хариуг нь өгөх хэрэгтэй. Хариулт нь буулт хийх биш, харин илүү хатуу цохилт байх ёстой. Киев өөрийн үүргийг биелүүлсэн. Одоо Путинд илүү хатуу хориг арга хэмжээ авах, Украинд илүү хүчтэй зэвсэг нийлүүлэх замаар хариуцлага тооцох хэрэгтэй”
хэмээн тэмдэглэсэн байв.
Путиний Валдайн өргөө ба Кремлийн хариу
Халдлагад өртсөн гэж мэдэгдэж байсан ерөнхийлөгч Путиний өргөө нь Москва ба Санкт Петербургийн хооронд орших Новгород мужид байрладаг. Валдайн ордон нэртэй энэ цогцолборт Путин амралтын өдрүүдээ гэр бүлийнхэнтэйгээ өнгөрөөдөг гэх мэдээлэл түгээмэл.
Лавровын анхны мэдэгдлийн дараа Кремлийн гадаад бодлогын зөвлөх Юрий Ушаков өмнөх өдөр нь Путин утсаар Трамптай ярьж, уг халдлагын талаар мэдээлснийг баталж байлаа. Ушаковын хэлснээр энэ үйл явдлын улмаас Оросын тал Украинд энх тайван тогтоох яриа хэлэлцээнд баримтлах байр сууриа дахин авч үзэхэд хүрсэн гэжээ.
Эх сурвалж: CNN
