Монгол, Казахстаны Шадар сайд нар эдийн засаг, дэд бүтцийн хамтын ажиллагааг эрчимжүүлэхээр тохиров

Монгол Улсын Шадар сайд Х.Ганхуяг болон БНКазУ-ын Шадар сайд бөгөөд Үндэсний эдийн засгийн сайд С.Жумангарин нар уулзаж, хоёр улсын худалдаа, хөрөнгө оруулалт болон бүс нутгийн дэд бүтцийн томоохон төслүүдийн талаар дэлгэрэнгүй санал солилцов. Талууд эдийн засгийн харилцааг шинэ шатанд гаргах, ялангуяа тарифын болон тарифын бус саад тотгорыг бууруулахад санал нэгдлээ.

Худалдааны эргэлт ба экспортын бүтэц

Өнгөрсөн оны байдлаар хоёр улсын худалдааны эргэлт 121.5 сая ам.долларт хүрч, өмнөх оноос 5.5 хувиар өсжээ. Худалдааны балансын хувьд Монгол Улсын экспорт давамгайлж байгааг дараах хүснэгтээс харж болно.

Шинэ авто зам ба “Дэлхийн адууны өдөр”

Уулзалтын нэгэн чухал сэдэв нь Баян-Өлгий–Казахстан чиглэлд ОХУ-ын нутаг дэвсгэрээр дамжин өнгөрөх шинэ авто зам нээх асуудал байв. Гурван талт хэлэлцээрийн хүрээнд талууд ойлголцолд хүрсэн бөгөөд одоо гуравдагч тал болох ОХУ-тай эцсийн зөвшилцлийг хийхээр болоод байна.

Мөн Шадар сайд Х.Ганхуяг Ерөнхийлөгч У.Хүрэлсүхийн санаачилсан “Дэлхийн адууны өдөр”-ийг 2026 оны долоодугаар сарын 13-нд зохион байгуулах гэж буйг дурдаж, Казахстаны талыг албан ёсоор урив. Казахстан Улс нь 4 сая орчим адуутай бөгөөд нүүдэлчин соёл, түүхэн өвөө сурталчлах энэхүү арга хэмжээнд идэвхтэй оролцохоо илэрхийллээ.

Хамтын ажиллагааны гол чиглэлүүд:

• Дэд бүтэц: Баян-Өлгий–Казахстан чиглэлийн авто замыг нээж, тээвэр логистикийг хөнгөвчлөх.
• Дипломат урилга: НҮБ-ын Цөлжилттэй тэмцэх конвенцийн (COP17) хуралд Казахстаны талыг оролцохыг урив.
• Технологи ба Сансар: Цахим шилжилт болон сансрын салбарт хамтарсан төсөл, хөтөлбөр хэрэгжүүлэх боломжийг судлах.
• Хөдөө аж ахуй: Мах, махан бүтээгдэхүүний экспортыг нэмэгдүүлж, хүнсний аюулгүй байдлын салбарт түншлэх.
• Чөлөөт бүс: Хоёр улсын эдийн засгийн тусгай бүсүүдийн хооронд хөрөнгө оруулалтын таатай орчныг бүрдүүлэх.