Манай улсын аж үйлдвэрийн салбарын үйлдвэрлэл энэ оны нэгдүгээр сарын урьдчилсан гүйцэтгэлээр 5.4 их наяд төгрөг болж, өмнөх оны мөн үеийнхээс 55 хувь буюу 1.9 их наяд төгрөгөөр нэмэгдсэн байна.
Өсөлтөд голлон нөлөөлсөн салбарууд
Үндэсний статистикийн хорооны мэдээлснээр өсөлтөд дараах салбаруудын нэмэгдэл голлон нөлөөлжээ.
Уул уурхай, олборлох аж үйлдвэрийн үйлдвэрлэл 68 хувь буюу 1.8 их наяд төгрөгөөр өссөн нь нийт нэмэгдлийн хамгийн том хэсгийг бүрдүүлэв. Харин цахилгаан, хий, уур, агааржуулалтын салбарын үйлдвэрлэл 34.3 хувь буюу 95.3 тэрбум төгрөгөөр өссөн нь мөн өсөлтийг дэмжсэн байна.
Уул уурхай, олборлох салбарын үйлдвэрлэлийн өсөлт
Нэгдүгээр сарын урьдчилсан гүйцэтгэлээр уул уурхай, олборлох аж үйлдвэрийн үйлдвэрлэл 4.4 их наяд төгрөг болсон байна. Үүнд:
Металлын хүдэр олборлолтын үйлдвэрлэл 2.2 дахин нэмэгдэж, 1.4 их наяд төгрөгөөр өссөн нь хамгийн хүчтэй өсөлтөөр тодорчээ. Мөн чулуун болон хүрэн нүүрс олборлолтын үйлдвэрлэл 29.9 хувь өсөж, 396.4 тэрбум төгрөгөөр нэмэгдсэн нь нийт өсөлтөд бодитой нөлөө үзүүлсэн байна.
Энэ салбарын биет хэмжээгээр авч үзвэл төмрийн хүдэр, зэсийн баяжмалын металл агуулга, мөн чулуун нүүрс болон төмрийн хүдрийн олборлолтын биет хэмжээ өмнөх оны мөн үеийнхээс 3.5 хувиас 2.3 дахин өссөн байна. Харин цэвэршүүлээгүй алт, газрын тос, хайлуур жонш, хүрэн нүүрс, мөнгө, цайрын баяжмал зэрэг бүтээгдэхүүний үйлдвэрлэл 2.5–89.1 хувиар буурсан гэж мэдээлжээ.
Боловсруулах үйлдвэрлэлд өссөн болон буурсан бүтээгдэхүүнүүд
Боловсруулах аж үйлдвэрийн салбарт зарим гол нэр төрлийн бүтээгдэхүүний үйлдвэрлэлийн биет хэмжээ өмнөх оны мөн үеийнхээс 1.8 хувиас 4.2 дахин өссөн байна. Үүнд ус, ундаа, жүүс, металл бэлдэц, шохой, ноолууран сүлжмэл эдлэл, самнасан ноолуур, цемент зэрэг багтжээ.
Нөгөө талд цагаан архи, шингэн сүү, гурил, цэвэр спирт, катодын зэс, янжуур тамхи, малын мах зэрэг нэр төрлийн бүтээгдэхүүний үйлдвэрлэл 1.5–60.4 хувиар буурсан дүн гарсан байна.
Борлуулалт огцом өсөж, уул уурхайн нөлөө давамгайлав
Аж үйлдвэрийн салбарын борлуулсан бүтээгдэхүүн өнгөрсөн сарын урьдчилсан гүйцэтгэлээр 8 их наяд төгрөгт хүрч, өмнөх оны мөн үеийнхээс 4.6 их наяд төгрөгөөр нэмэгдсэн байна. Энэ өсөлтөд уул уурхайн салбарын борлуулалт 4.4 их наядаар өссөн нь гол нөлөө үзүүлжээ.
Гадаад зах зээл дэх борлуулалтын бүтэц
Өнгөрсөн сарын урьдчилсан гүйцэтгэлээр гадаад зах зээлд 6.4 их наяд төгрөгийн борлуулалт хийснээс 6.3 их наяд төгрөг нь уул уурхай, олборлох салбарын борлуулалт байсан байна.
Уул уурхайн бүтээгдэхүүний экспортын борлуулалтын бүтэц дараах байдлаар бүрджээ. Нүүрс 26.5 хувь, металлын хүдэр 71.7 хувь, газрын тос 0.9 хувь, бусад ашигт малтмал олборлолт 0.9 хувийг эзэлж байсан байна.
Үйлдвэрлэлийн индекс буурсан дүнтэй гарчээ
Нөгөө талаас аж үйлдвэрийн үйлдвэрлэлийн индексийг улирлын нөлөөллийг арилгасан байдлаар тооцоход энэ оны нэгдүгээр сард 194.1 (2015=100) болж, өмнөх оны мөн үеийнхээс 26.5 хувиар буурсан үзүүлэлт гарсан байна.
