Нью-Мексико муж Meta-г хүүхдийг хамгаалаагүй гэж үзэн шүүхэд өгчээ
Марк Цукерберг шинжээчдийн зүгээс “түүхэн” гэж нэрлэж буй шүүх хурал дээр мэдүүлэг өгсөн байна. Уг хэрэг нь “Нью-Мексико муж Meta-гийн эсрэг” гэсэн маргаан бөгөөд хэлэлцүүлгийн явцад 2018 онд Цукерберг Apple-ийн гүйцэтгэх захирал Тим Кук руу өсвөр үе, хүүхдийн сайн сайхны тухай сэдвээр өөрийн биеэр захидал илгээж байсан нь тодорчээ.
Энэ нэхэмжлэл 2023 онд гарсан. Мужийн эрх баригчид Meta-г Facebook, Instagram хэрэглэгчдийг, тэр дундаа хүүхдүүдийг онлайнаар бай онилдог этгээдүүдээс хамгаалж чадаагүй гэж буруутгаж байна. Прокуроруудын тайлбараар бол платформууд зөвхөн бэлгийн мөлжлөгийн шинжтэй контент, хүүхдийн хүчирхийллийн материал түгэхээс сэргийлээгүй төдийгүй, ийм төрлийн контент руу үзэгчдийг, тэр дундаа насанд хүрээгүй хүүхдүүдийг чиглүүлж, “аудитори” бүрдүүлэхэд нь бодитоор нөлөөлсөн гэж үзжээ. Мөн тус мужийн нутаг дэвсгэрт хүний наймаа, мөлжлөгт дэмжлэг үзүүлсэн гэх агуулга нэхэмжлэлд тусгагдсан байна.
Нью-Мексико мужийн ерөнхий прокурор Рауль Торрес CNBC-д хэлэхдээ “Бид Meta хүүхдүүдээс хохирогч хайх төдийгүй тэднийг виртуал болон бодит орчинд мөлжих боломж олгодог аюултай бүтээгдэхүүн бүтээсэн гэж үзэж байна” гэж мэдэгдсэн байна.
Тим Кукт илгээсэн захидал шүүх дээр сөхөгдөв
Байцаалтын үеэр хамгаалалтын тал 2018 оны хоёрдугаар сард Тим Куктой солилцсон захидлын баримтыг Цукербергт үзүүлжээ. Цукербергийн тайлбараар, тэр үед өөрийн компани болон Apple хамтран хэрэгжүүлж болох боломжуудын талаар ярилцах хүсэлтэй байсан бөгөөд гол сэдэв нь “манай үйлчилгээг ашигладаг өсвөр насныхан, хүүхдийн сайн сайхан байдал” байсан гэжээ. Гэхдээ захидлын дэлгэрэнгүй агуулгыг шүүх хурал дээр бүрэн задлаагүй байна.
Энэ захидал солилцоо нь хоёр удирдлагын харилцаа олон нийтэд хурцдахаас өмнө болжээ. 2018 оны гуравдугаар сард Facebook-ийн өгөгдөл, нууцлалтай холбоотой дуулианы үеэр Тим Кук хэд хэдэн удаа байр сууриа илэрхийлснээр ил тод зөрчил хурцадсан гэж мэдээлсэн байна.
Нас баталгаажуулалт дээр Meta ба Apple-ийн байр суурь зөрчилдөж байна
Тим Кукийн нэр энэ хэрэгт хоёр дахь удаагаа дурдагдаж байгаа аж. Үүнээс өмнө шүүхийн явцад өөр нэг дотоод захидал олон нийтэд ил болж, түүнд Цукерберг Meta-ийн платформын хор нөлөөний талаарх судалгааны цар хүрээг багасгах санал гаргасан гэх агуулга, мөн жишээ болгон Apple-ийг нэрлэсэн тухай мэдээлжээ.
Үндсэн маргаантай сэдвүүдийн нэг нь хэрэглэгчийн насыг баталгаажуулах хариуцлага юм. Meta энэ үүргийг апп дэлгүүрүүдийн эзэд болох Apple, Google шийдэх ёстой гэж үздэг. Харин Apple эсрэг байр суурьтай бөгөөд насыг баталгаажуулах механизмыг платформын түвшинд биш, апп тус бүрийн түвшинд буюу хөгжүүлэгч өөрөө шийдэх ёстой гэж тайлбарлаж байна.
Шинжээчид 1990-ээд оны тамхины салбарын шүүхүүдтэй зүйрлэжээ
Одоогийн Meta-гийн эсрэг өрнөж буй нэхэмжлэлүүдийг зарим шинжээч 1990-ээд онд тамхины үйлдвэрлэгчдийн эсрэг явсан томоохон шүүх ажиллагаатай зүйрлэж байна. Үүний шалтгаан нь урьдчилан таамаглаж буй хор уршгийн цар хүрээ, мөн хэрэглэгчийн эрүүл мэнд, аюулгүй байдалд үзүүлэх сөрөг нөлөөний талаарх мэдээллийг санаатайгаар нуун дарагдуулсан байж болзошгүй гэх шинжтэй буруутгалтай холбоотой гэж үзжээ.
