1.5 тэрбум төгрөгийн шагналын сантай “Алтан цом”-ын төлөөх барилдаанууд өчигдөр өндөрлөж, аваргын төлөөх гол өрсөлдөөнд Улсын заан С.Сүхбат ахлагчтай “Хатант интернэйшнл” баг түрүүллээ.
Аваргын төлөөх барилдаанд “Хатант интернэйшнл” илүүрхэв
Тэргүүн байрын төлөө Улсын арслан Э.Батмагнай ахлагчтай “М-Си-Эс Энержи” баг болон Улсын заан С.Сүхбат ахлагчтай “Хатант интернэйшнл” багууд хоорондоо хүч үзсэн байна. Шийдвэрлэх барилдаанд “Хатант интернэйшнл” 14:11-ийн харьцаагаар ялалт байгуулж, “Алтан цом”-ын тэргүүн байрыг хоёр дахь удаагаа хүртлээ.
Үүнээс нэг өдрийн өмнө болсон гуравдугаар байрын төлөөх барилдаанд Дархан аварга Н.Батсуурь ахлагчтай “Хамаг Монгол” баг, Улсын арслан Б.Орхонбаяр ахлагчтай “АПУ Скайтел” багтай учраа таарсан юм. Энэ барилдаанд “Хамаг Монгол” мөн 14:11-ийн харьцаагаар өрсөлдөгчөө давж, гуравдугаар байрт шалгарчээ.
Шагналын сан 1.5 тэрбум төгрөгт хүрэв
Энэ удаагийн “Алтан цом” тэмцээн нийт 1.5 тэрбум төгрөгийн шагналын сантайгаар зохион байгуулагдсан байна. Тэмцээний хүрээнд байр эзэлсэн багууд дараах мөнгөн шагналыг гардсан юм.
- Тэргүүн байр — 500 сая төгрөг
- Дэд байр — 250 сая төгрөг
- Гуравдугаар байр — 150 сая төгрөг
- Дөрөвдүгээр байр — 100 сая төгрөг
- Тавдугаар байр — 65 сая төгрөг
- Зургаадугаар байр — 60 сая төгрөг
- 7-8 дугаар байрт шалгарсан баг тус бүр — 50 сая төгрөг
Ингэснээр энэ жилийн “Алтан цом” өндөр шагналын сан, хүчтэй өрсөлдөөн, нэр хүндтэй багуудын тулаанаар онцлог болж өндөрлөлөө.
