Францын хууль тогтоогчид эдгэршгүй өвчтэй насанд хүрэгчдэд бусдын тусламжтайгаар амьдралаа дуусгах эрхийг хуульчлах төслийг баталж, олон жил үргэлжилсэн ёс зүй, улс төрийн маргаанд томоохон шийдвэр гаргалаа.
Өндөр шалгууртай шинэ зохицуулалт батлагдав
Лхагва гарагт батлагдсан шинэ хуулийн дагуу амь насанд аюултай, эдгэршгүй өвчнөөр шаналж буй зарим иргэнд үхлийн аюултай бодис хэрэглэх боломжийг маш хатуу нөхцөлтэйгөөр олгох юм.
Уг бодисыг тухайн өвчтөн өөрөө хэрэглэх ёстой. Харин биеийн байдлаас шалтгаалан өөрөө хэрэглэх боломжгүй бол эмч, сувилагч зэрэг мэргэжлийн хүний тусламжтай хэрэглэхээр зохицуулжээ.
Энэ эрхийг Францын насанд хүрсэн иргэн, эсвэл Франц улсад хууль ёсоор оршин суугч хүн эдлэх боломжтой. Гэхдээ тухайн хүн амь насанд аюултай, эдгэршгүй өвчтэй, өвчний улмаас бие махбодын болон сэтгэл санааны байнгын зовлон эдэлж буй, мөн мэдээлэлд үндэслэн өөрийн сонголтоо ухамсартайгаар илэрхийлэх чадвартай байх ёстой юм.
Санал хураалт ойролцоо дүнтэй болжээ
Францын парламентын доод танхимын эцсийн санал хураалтаар хуулийн төслийг 291 гишүүн дэмжиж, 241 гишүүн эсэргүүцсэн байна.
Ингэснээр Франц улс эдгэршгүй өвчтэй хүмүүсийн амьдралын төгсгөлийн сонголтыг хууль эрх зүйн хүрээнд зохицуулах зам руу орж байна.
Макрон амлалтаа биелүүлсэн гэв
Францын ерөнхийлөгч Эммануэл Макрон уг асуудлыг хүний амь нас, зовлон шаналал, нэр төртэй холбоотой маш эмзэг сэдэв гэж тодорхойлжээ.
“Хувь хүний амь нас, зовлон шаналал, нэр төртэй холбоотой энэ эмзэг асуудлыг зөвхөн сонсож, хэлэлцэж, мэтгэлцэх замаар шийдвэрлэх ёстой байсан. 2022 онд би Францын ард түмэнтэй хамт энэ замыг бий болгох амлалт өгсөн. Би энэ амлалтаа ардчиллын зарчмыг бүрэн хүндэтгэх замаар биелүүллээ” гэж Францын ерөнхийлөгч Эммануэл Макрон сошиал хуудсаараа мэдэгджээ.
Олон нийтийн дэмжлэг өндөр байна
Францын иргэдийн дийлэнх нь сайн дурын үндсэн дээр амьдралаа дуусгах эрхэд нээлттэй хандаж буйг санал асуулгын дүн харуулж байна.
Хоёрдугаар сард нийтлэгдсэн Ifop-ийн судалгаагаар оролцогчдын 84 хувь нь ийм эрхийг дэмжиж байгаагаа илэрхийлжээ.
Францын Нэр төртэй Үхэх Эрхийн Холбоо буюу ADMD-ийн төлөөлөгч Анн Рейно энэ эрхийг хүнд өвчний улмаас найдваргүй болсон хүмүүсийн нэр төртэй сонголт гэж үзэж байна.
“Зовлон шаналлаасаа болоод юу ч хийж чадахгүй болохыг амьдрал гэж нэрлэж болох уу? Зовлон нь тэвчихийн аргагүй болж, найдвар тасарсны дараа хүмүүс хэзээ, хэрхэн үхэхээ өөрсдөө шийддэг байх ёстой” гэж Францын Нэр төртэй Үхэх Эрхийн Холбооны (ADMD) төлөөлөгч Анн Рейно хэлж байна.
Эсэргүүцэгчид эмзэг бүлэгт дарамт үүснэ гэж болгоомжилж байна
Гэсэн ч шинэ хууль бүх нийтийн дэмжлэгийг авсангүй. Зарим анагаах ухааны байгууллага болон шашны төлөөлөгчид ийм эрхийг хуульчлах нь эмзэг бүлгийн хүмүүсийг далд дарамтад оруулж болзошгүй гэж анхааруулж байна.
Католик сүм хийд уг хуулийг эсэргүүцэгчдийн нэг хэвээр байгаа бөгөөд төслийг дэмжсэн хууль тогтоогчдод сүмийн ёслол үйлдэхээс татгалзах тухай дээд зиндааны санваартан анхааруулж байсан юм.
Европ, АНУ-д ижил төстэй хууль бий
Францаас өмнө Швейцар, Бельги, Нидерланд зэрэг Европын хэд хэдэн улс бусдын тусламжтай амьдралаа дуусгах эрхийг хууль эрх зүйн хүрээнд зөвшөөрсөн байдаг.
Мөн АНУ-ын зарим муж эдгэршгүй өвчтэй хүмүүст эмнэлгийн тусламжтайгаар нас барах боломжийг хуульчилсан байна.
Өвчтөн эхлээд эмчид хүсэлт гаргана
Францад батлагдсан шинэ журмаар өвчтөн эхний ээлжид эмчид албан ёсоор хүсэлт гаргах ёстой. Дараа нь уг хүсэлтийг эмч дор хаяж өөр нэг эмч болон анагаах ухааны мэргэжилтэнтэй хамтран хянах юм.
Хэрэв хүсэлт хуульд нийцсэн гэж үзвэл өвчтөнд шийдвэрээ дахин бодож үзэх хамгийн багадаа хоёр өдрийн хугацаа олгоно.
Эмч тухайн хүсэлтийг биелүүлэхээс татгалзах эрхтэй. Гэхдээ ийм тохиолдолд өвчтөнд туслахад бэлэн байгаа өөр мэргэжилтнүүдийн нэрийг өгөх үүрэгтэй байна.
Францын нийгэмд шинэ үе эхэлж байна
Энэхүү хууль нь Францын нийгэмд амьдралын төгсгөл, өвчтөний хүсэл зориг, эмнэлгийн ёс зүй, хүний нэр төрийн тухай маргааныг шинэ шатанд гаргаж байна.
Дэмжигчдийн хувьд энэ нь тэвчихийн аргагүй зовлонтой хүмүүсийн сонголтыг хүндэтгэх алхам бол эсэргүүцэгчдийн хувьд хамгаалалт сул хүмүүсийг эрсдэлд оруулж мэдэх аюултай шийдвэр юм.
Гэсэн ч парламентын санал хураалтын дараа Франц эдгэршгүй өвчтэй насанд хүрэгчдэд хатуу шалгуурын хүрээнд амьдралаа дуусгах эрх олгосон Европын орнуудын эгнээнд нэгдлээ.
