Чингэлтэй дүүрэгт гарсан гал түймрийг шуурхай унтраав
Онцгой байдлын алба хаагчид гал түймрийн дуудлагад үүрэг гүйцэтгэх үеэрээ бага насны хоёр хүүхдийг галын аюултай нөхцөлөөс аварчээ.
2026 оны 1 дүгээр сарын 19-ний өдрийн 10:17 цагт Чингэлтэй дүүргийн 19 дүгээр хороонд байшин шатаж байна гэсэн дуудлага өгөхөд Сүхбаатар дүүргийн Онцгой байдлын хэлтсийн харьяа Гал түймэр унтраах, аврах 34 дүгээр ангийн бүрэлдэхүүн газар дээр нь очин ажилласан байна.
Очиход 7х7 метр хэмжээтэй байшингийн галлагааны өрөөний дээврийн хэсэг шатаж байсан бөгөөд алба хаагчид галын тархалтыг богино хугацаанд хяналтдаа авч, бүрэн унтрааж ажиллав.
Галын голомтоос 8, 4 настай хүүхдүүдийг гарган аврав
Гал түймрийг унтраах ажиллагааны үеэр гал гарсан өрөөнд 8 настай эмэгтэй, 4 настай эрэгтэй хоёр хүүхэд байсныг илрүүлж, нэн яаралтай аюулгүй бүс рүү гарган авсан байна.
Ингэснээр бага насны хүүхдүүдийг утаанд угаартуулах, галын шууд нөлөөнд өртөх аюулыг таслан зогсоож, амь нас, эрүүл мэндийг нь хамгаалжээ. Хүүхдүүдийг гаргасны дараа гал түймрийг бүрэн дарж, ойролцоох барилга байгууламж, оршин суугчдад галын нэмэлт эрсдэл үүсэхээс сэргийлсэн байна.
Эцэг эх, асран хамгаалагчдад хандсан сэрэмжлүүлэг
Сурагчдын амралтын үе үргэлжилж буйтай холбоотойгоор бага насны хүүхдүүд гэртээ ганцаар үлдэх, том хүний хяналтгүй байх тохиолдол олширч байгааг нийслэлийн Онцгой байдлын газраас анхаарууллаа.
Тус газраас эцэг эх, асран хамгаалагчдад хүүхдүүдээ гэртээ орхихдоо галын аюултай хэрэгсэл, цахилгаан хэрэгслийг асаалттай үлдээхгүй байх, зуух, галлагаа, цахилгааны ачаалал, залгуурын хэрэглээ зэрэгт онцгой анхаарал хандуулах, мөн хүүхдэд гал түймрийн үед хэрхэн авран гарах, тусламж дуудах талаар насанд нь тохирсон ойлголт өгөхийг онцгойлон зөвлөж байна.
Гал түймрийн эрсдэл өндөр улиралд нэг анхаарал алдсан үйлдэл хүний амь, эрүүл мэндэд ноцтой хор уршиг дагуулж болзошгүйг сануулж, гэр бүлийн орчинд аюулгүй байдлаа тогтмол шалгаж байхыг дахин сануулжээ.
