Хөлбөмбөгийн ДАШТ-ий хасагдах шатанд Өмнөд Солонгосын шигшээ багаа тоглохыг хүлээж байсан Лос-Анжелес дахь солонгос иргэд тус багийн огцорсон дасгалжуулагч Хон Мюн Бог тун таагүй хүлээн авчээ.
Өмнөд Солонгосын шигшээг хэсгийн шатнаас гаргаж чадаагүй Хон Мюн Бо албан тушаалаасаа огцорсноосоо хэдхэн хоногийн дараа буюу Пүрэв гарагт Лос-Анжелес хотод ирсэн байна.
Парламентын сонсголын өмнө АНУ-д очсон нь бухимдал төрүүлэв
Одоогоор Өмнөд Солонгосын парламентын гишүүд Солонгосын Хөлбөмбөгийн Холбооны удирдлагуудыг оролцуулсан сонсгол зохион байгуулахаар бэлтгэж байна. Уг сонсголоор үндэсний шигшээ баг ДАШТ-д яагаад ийм амжилтгүй оролцсон, хариуцлага хэнтэй холбоотойг тодруулах зорилготой аж.
Ийм эгзэгтэй үед Хон Мюн Бо гадаадад аялж яваа нь зөвхөн Өмнөд Солонгост бус, хилийн чанад дахь солонгос иргэдийн дунд ч хүчтэй шүүмжлэл дагуулаад байна.
Лос-Анжелесын солонгос бизнесүүд Хоныг оруулахгүй гэв
Лос-Анжелес хотод солонгос эзэнтэй зарим үйлчилгээний газар Хон Мюн Бог оруулахгүй гэдгээ илэрхийлсэн тэмдэг үүдэндээ байрлуулж эхэлжээ.
Солонгос гаралтай америкчуудын MissyUSA цахим форум дээр орон нутгийн бизнес эрхлэгчдэд Хон Мюн Бог “бойкотлох” уриалга гарсан бөгөөд уг уриалга олон хүний дэмжлэг авч байна.
Уриалгад “Тэр өөрийгөө Солонгосоос явахаар хүмүүс мартана гэж бодож байгаа бололтой. Гэхдээ энд солонгосчуудын эзэмшдэг олон бизнес байдаг. Бүгдээрээ ‘Хон Мюн Бо, эндээс гар’ гэсэн тэмдгийг үүдэндээ тавьцгаая. Энд солонгосчууд маш олон тул Хон эсэргүүцлийг энд бас мэдрэх ёстой” гэж өгүүлжээ.
Лос-Анжелес дахь солонгосчууд яагаад илүү ууртай байна вэ?
Хэрэв Өмнөд Солонгосын шигшээ баг хэсгээсээ хоёрдугаар байраар шалгарсан бол Лос-Анжелес хотод болох шөвгийн 32 багийн тоглолтод оролцох боломжтой байжээ.
Иймээс тус хотод амьдардаг солонгос иргэд Хон Мюн Бод илүү хатуу хандаж байгаа аж. Тэдний үзэж буйгаар, дасгалжуулагчийн сонгосон буруу тактик нь үндэсний шигшээ багийг хэсгийн шатнаас хасагдахад гол нөлөө үзүүлсэн байна.
Калифорнид амьдардаг нэгэн солонгос хүн цахим форумд “Би шөвгийн 32 болон 16 багийн тоглолтуудыг үзэхээр тасалбар худалдаж аваад байсан ч өнөөдөр Лос-Анжелес нисэх тийзээ цуцлаад сууж байна” гэж бичжээ.
“АНУ-д аялах биш, Солонгост хариулт өгөх ёстой” гэж шүүмжилжээ
Олон хүн Хон Мюн Бог огцорсныхоо дараа АНУ-д аялахын оронд Өмнөд Солонгост үлдэж, багийнхаа ДАШТ-д үзүүлсэн гүйцэтгэлийн талаар хууль тогтоогчдын асуултад хариулах ёстой гэж үзэж байна.
Тэдний хувьд үндэсний шигшээ багийн амжилтгүй оролцоо зөвхөн спортын үр дүн биш, харин хариуцлага нэхэх ёстой асуудал болсон бололтой.
Зарим хүн хэт хатуурхлыг эсэргүүцэв
Гэсэн ч Хон Мюн Бог хэт жигшин зэвүүцэх, хувийн түвшинд дарамтлахыг дэмжихгүй хүмүүс ч байна. Тэд асуудлыг зөвхөн нэг дасгалжуулагч дээр тохохоос илүү түүнийг томилсон холбоо, удирдлагуудтай нь хариуцлага ярих ёстой гэж үзжээ.
Тэд “Хон чадваргүй дасгалжуулагч байсан байж магадгүй ч энэ хатуурхал хэтэрсэн гэж бодож байна. Түүнийг томилсон холбоо болон удирдлагуудтай нь хариуцлага тооцох хэрэгтэй бус уу?” гэж бичсэн байна.
Ийнхүү Өмнөд Солонгосын шигшээ багийн ДАШТ-ийн бүтэлгүйтэл зөвхөн эх орондоо бус, АНУ дахь солонгос иргэдийн дунд ч хүчтэй эсэргүүцэл дагуулж, Хон Мюн Богийн нэр Лос-Анжелест хүртэл маргааны төвд орлоо.
