Ираны зэвсэгт хүчний удирдлага шинэ мэдэгдэл хийжээ
Ираны зэвсэгт хүчний удирдлага АНУ-ын цэргийн алба хаагчийг хөнөөсөн эсвэл олзолсон тохиолдол бүрд 30 мянган ам.долларын шагнал олгоно гэж мэдэгдсэн байна. Мөн ийм үйлдэл хийсэн хүн эмэгтэй байвал шагналыг хоёр дахин нэмэгдүүлнэ гэж дурджээ.
Ираны армийн командлагч Амир Хатами энэ төлөвлөгөөг иргэдээс ирсэн хүсэлтийн дагуу боловсруулсан гэж IRNA агентлагт ярьсан байна.
АНУ-ын хуурай замын цэрэг Ираны нутагт нэвтрээгүй байна
Ойрхи Дорнодод үргэлжилж буй дайн долоо дахь сардаа орж байгаа ч одоогоор АНУ-ын хуурай замын цэрэг Ираны нутаг дэвсгэрт нэвтэрсэн тохиолдол гараагүй гэж мэдээлэгдэж байна.
Өнгөрсөн дөрөвдүгээр сард Ираны нутагт унасан онгоцны америк нисгэгчийг аврах ажиллагаа явуулсан тохиолдлыг эс тооцвол АНУ-ын цэргүүд Ираны нутагт хөл тавьсан тухай мэдээлэл байхгүй юм.
Хатами ямар газар, ямар нөхцөлд хөнөөгдсөн эсвэл олзлогдсон цэргийн тухай ярьж байгаагаа нарийвчлан тайлбарлаагүй байна.
“30 000 ам.доллар буюу таван тэрбум томан”
Амир Хатами мэдэгдэлдээ “Америкийн цэргийн алба хаагчдыг хөнөөж, олзолж, хүлээлгэн өгсөн хэн бүхэнд Исламын Бүгд Найрамдах Иран Улсын армиас 30 000 ам.доллар буюу таван тэрбум томантай тэнцэх хэмжээний шагнал олгоно” гэж хэлжээ.
Томан нь Иранд өргөн хэрэглэгддэг мөнгөний албан бус нэршил бөгөөд 10 мянган риалтай тэнцдэг байна.
Мөн тэрээр “Ийм ажил гүйцэтгэсэн Ираны зоригт эмэгтэйчүүд үүнээс хоёр дахин их шагнал хүртэх болно” гэж нэмж мэдэгдсэн байна.
Өмнө нь АНУ-ын нисгэгчийг аврах томоохон ажиллагаа явуулжээ
Дайн эхэлснээс хойш нэг сар гаруйн дараа АНУ-ын F-15 сөнөөгч онгоц Ираны нутаг дэвсгэрт унасан. Тухайн үед нисгэгчийг аврах зорилгоор Пентагон том хэмжээний ажиллагаа зохион байгуулсан гэж мэдээлэгдэж байна.
Энэхүү ажиллагаанд 200 орчим цэрэг, 170 гаруй нисэх онгоц оролцсон аж. Ажиллагааны үеэр Ираны цэргүүд АНУ-ын A-10 довтолгооны нисдэг тэргийг гэмтээсэн бөгөөд Ираны нутагт үлдээхээс өөр аргагүй болсон C-130 тээврийн нисэх онгоцыг АНУ өөрөө устгасан байна. Ингэснээр уг онгоцыг эсрэг талын гарт оруулахаас сэргийлжээ.
Гал зогсоох тохиролцоо нурж, мөргөлдөөн үргэлжилж байна
Ойролцоогоор 40 хоног үргэлжилсэн дайны дараа дөрөвдүгээр сард түр гал зогсоох тохиролцоонд хүрсэн. Дараа нь зургаадугаар сард талууд санамж бичигт гарын үсэг зурж, тохиролцоог үргэлжлүүлэхээр болсон байна.
Гэвч долдугаар сарын эхээр уг санамж бичгээр баталгаажсан тохиролцоо нуран унаснаар талууд үе үе харилцан агаарын довтолгоо явуулсаар байгаа аж.
Одоогоор мөргөлдөөний гол бүс нь Ираны өмнөд хэсэг болон Ормузын хоолой орчимд төвлөрч байна.
АНУ-ын 17 цэрэг амиа алдсан гэж мэдээлжээ
Дайн эхэлснээс хойш АНУ-ын 17 цэрэг амиа алдсан гэж мэдээлэгдэж байна. Гэхдээ эдгээр тохиолдол бүгд Ираны нутаг дэвсгэрийн гадна, Йордан, Ирак зэрэг бүс нутгийн орнуудад болсон аж.
Ираны талын шинэ мэдэгдэл нь бүс нутгийн хурцадмал байдлыг улам нэмэгдүүлэх эрсдэлтэй гэж ажиглагчид үзэж байна.
