Монгол Улсын гавьяат тамирчин Мягмардуламын Нандинцэцэг мэргэжлийн боксын рингэнд хийсэн анхны тулаандаа ялалт байгуулж, шинэ гараагаа амжилттай эхлүүллээ.
Есдүгээр сарын 26-нд АНУ-ын Мэриланд мужийн Балтимор хотын Patapsco Arena-д PTP буюу Ponytail Promotions-оос зохион байгуулсан World Championship Boxing Series LXXXI тэмцээний хүрээнд тэр Мичиган мужийн Shynyia Jones-той тулалдсан байна.
Эхний раундад нокаутаар ялжээ
М.Нандинцэцэг мэргэжлийн боксын дебют тулаандаа өрсөлдөгчөө эхний раундад нокаутаар буулган авч, анхны ялалтаа бүртгүүлжээ.
Ингэснээр сонирхогчдын бокст олон жил Монголын нэрийг олон улсын тавцанд гаргаж ирсэн тамирчин мэргэжлийн боксын замналаа ч ялалтаар эхлүүлж байна.
Монголын эмэгтэй боксын түүхэнд нэрээ үлдээсэн тамирчин
М.Нандинцэцэг сонирхогчдын боксын замналдаа Монголын эмэгтэй боксын олон түүхэн амжилтын эзэн болсон.
Тэр 2014 оны Азийн наадмаас хүрэл медаль хүртэж, 2018 оны Дэлхийн аварга шалгаруулах тэмцээнээс мөн хүрэл медаль авсан юм.
Эдгээр амжилтаараа Монголын эмэгтэй боксчдоос тив, дэлхийн хэмжээний томоохон тэмцээнээс медаль хүртсэн анхны тамирчдын нэг болж, улмаар эмэгтэй боксчдоос Монгол Улсын гавьяат тамирчин цол хүртсэн анхны тамирчин болсон байна.
Мөн Дэлхийн цомоос мөнгөн медаль, Азийн аварга шалгаруулах тэмцээнээс нэг мөнгө, гурван хүрэл медаль эх орондоо авчирч байжээ.
АНУ-д бэлтгэлээ үргэлжлүүлж байна
Сүүлийн жилүүдэд М.Нандинцэцэг АНУ-ын Виржиниа мужид амьдарч, бэлтгэл сургуулилтаа тасралтгүй үргэлжлүүлэн, олон тэмцээнд оролцож байгаа юм.
Тэр өнгөрсөн тавдугаар сард Тулса хотод болсон Golden Gloves of America буюу АНУ-ын сонирхогчдын боксын үндэсний аварга шалгаруулах тэмцээнд 54 кг-ын жинд түрүүлж, аваргын алтан медаль хүртсэн байна.
Ийнхүү олон жилийн турш сонирхогчдын бокст амжилт гаргасан М.Нандинцэцэг мэргэжлийн бокст шилжсэн анхны тулаанаа эхний раундад нокаутаар өндөрлөж, дараагийн шинэ шатандаа хүчтэй эхлэл тавилаа.
