УИХ-ын даргын нэр дэвшигчийн асуудлыг бүлгийн хурлаар хэлэлцэв
УИХ дахь МАН-ын бүлэг өнөөдөр хуралдаж, УИХ-ын даргад нэр дэвшигчийг тодруулах асуудлыг хэлэлцэн авч үзлээ.
Хуралдааны эхэнд УИХ-ын даргад С.Бямбацогтыг нэр дэвшүүлж буй үндэслэлийг танилцуулсан байна. Түүнийг парламентад ажилласан хугацаа, боловсролын түвшин, төрийн ажлын туршлагыг нь харгалзан энэ албан тушаалд нэр дэвшүүлжээ.
Парламентын туршлага, сонгуулийн амжилтыг нь онцолжээ
С.Бямбацогт нь иргэд, сонгогчдын дэмжлэгийг авч, 2008 оноос хойш нэг тойргоос тасралтгүй таван удаа Улсын Их Хурлын гишүүнээр сонгогдсон улс төрч юм. Мөн 2024 оны УИХ-ын сонгуулиар парламентын түүхэнд хамгийн өндөр санал авч сонгогдсон гишүүн гэдгийг хурлын үеэр онцолсон байна.
Төрийн өндөр албан тушаалуудыг хашиж байсан туршлагатай гэж үзэв
Түүний ажилласан замналыг танилцуулахдаа Хууль зүй, дотоод хэргийн сайд, Батлан хамгаалахын сайд, Зам, тээврийн хөгжлийн сайд, Засгийн газрын Хэрэг эрхлэх газрын дарга зэрэг төрийн өндөр албан тушаалуудыг хашиж ирснийг дурджээ.
Үүнээс гадна Төрийн байгуулалтын байнгын хороо, Хууль зүйн байнгын хороог ахалж ажиллаж байсан нь парламентын бүх шатны бүтцэд удирдах түвшинд ажилласан туршлагатайг нь харуулж байна гэж үзсэн байна.
Хууль санаачлах болон эрх зүйн шинэчлэлд оруулсан хувь нэмрийг дурдав
С.Бямбацогт нь нийт 50 гаруй хуулийн төсөл санаачилсан бөгөөд 2019 оны Үндсэн хуулийн нэмэлт, өөрчлөлтийн эх баригчдын нэгээр ажилласан гэж танилцуулжээ.
Мөн Монгол Улсын урт хугацааны хөгжлийн бодлогыг тодорхойлоход оролцсон, УИХ-ын хяналт шалгалтын тухай анхны хуулийн төслийг санаачилсан, эрх зүйн салбарын олон шинэчлэлийг хэрэгжүүлэхэд оролцсон туршлагатай парламентч хэмээн үнэлж, ийнхүү нэр дэвшүүлсэн байна.
Бүлгийн олонх нэр дэвшүүлэлтийг дэмжжээ
Ингээд МАН-ын бүлгийн гишүүдийн олонх нь С.Бямбацогтыг УИХ-ын даргад нэр дэвшүүлж буй саналыг дэмжсэн байна.
