“Friends” цувралын Chandler Bing-ийн дүрээр дэлхий даяар танигдсан Matthew Perry таалал төгсөөд гурван жил өнгөрч байгаа энэ үед түүний гэр бүлийн хүрээнд болсон хаалттай оршуулгын талаар шинэ дэлгэрэнгүй мэдээлэл ил болжээ.
Netflix-ийн “The Matthew Perry Story” баримтат цувралыг найруулсан Mary Robertson аравдугаар сарын 22-нд Page Six-д өгсөн ярилцлагадаа гурван ангит бүтээлийн хамгийн их сэтгэл хөдөлгөсөн хэсгүүдийн нэг нь Matthew Perry-ийн дүү Mia Perry оршуулгын талаар дурссан мөч байсан гэж ярьсан байна.
Найруулагчийн хэлснээр Mia тэр өдрийг маш хүнд, эмгэнэлтэй байсан ч нэгэн мөчид ах нь яг дэргэд нь байгаа мэт мэдрэмж төрж, өөрийн эрхгүй инээсэн тухайгаа ярьжээ.
Mary Robertson:
“Миа тэр өдрийг үнэхээр сэтгэл өвтгөм, аймшигтай байсан гэж дүрсэлсэн. Гэхдээ оршуулгын үеэр Matthew яг хажууд нь байгаа мэт санагдаж, тэр гэнэт инээсэн гэсэн. Тэр бүх зүйл замбараагүй санагдсан гэж хэлэхэд нь би оршуулгын үеэр инээх нь ер бусын зүйл биш гэж хэлсэн. Би түүний уй гашууг хөнгөлөх гэж зориуд тэгж хэлээгүй”
хэмээн ярьжээ.
Тэр үргэлжлүүлэн:
“Энэ нь Matthew-ийн амьдрал, туулсан туршлага төдийгүй бид бүгдийн амьдралтай ч нийцэж байгаа мэт санагдсан”
гэжээ.
“Friends”-ийн таван жүжигчин гар гараасаа барин авсанд нь ойртжээ
Mary Robertson-ийн ярьснаар Mia Perry оршуулгын үеэр “Friends”-ийн жүжигчидтэй уулзсан мөчөө ч баримтат кинонд дурссан байна.
Тухайн үед Jennifer Aniston Mia-г тэвэрч тайвшруулсан бөгөөд дараа нь “Friends”-ийн таван гол жүжигчин гар гараасаа барин Matthew Perry-ийн авсанд ойртож, бүгд нулимс дуслуулсан гэжээ.
Энэхүү дурсамж нь тэд Matthew Perry-тэй олон жилийн турш ямар ойр харилцаатай байсныг дахин сануулсан сэтгэл хөдөлгөм мөч болсон байна.
Гэхдээ “Friends”-ийн жүжигчид шинэ баримтат цувралд өөрсдөө оролцоогүй аж.
Mary Robertson энэ талаар:
“Бид тэднээс оролцох эсэхийг асуусан ч тэд татгалзсан. Гэсэн ч тэд Matthew-д хайртай байсан, түүний үхэлд гүн харамсаж байгааг бид мэднэ”
хэмээн хэлжээ.
Matthew Perry 2023 онд 54 насандаа таалал төгссөн. Түүний үхлийг кетаминтай холбоотой ослын шалтгаант нас баралт гэж тогтоосон бөгөөд амьд ахуйдаа сэтгэл гутрал, түгшүүрийн шинж тэмдгийн улмаас кетамин эмчилгээ хийлгэж байсан тухай мэдээлэгдсэн юм.
Jennifer Aniston мөн өнгөрсөн оны наймдугаар сард Vanity Fair-д өгсөн ярилцлагадаа Matthew-ийн донтолтын асуудалтай олон жил тэмцсэнийг дурсан ярьсан байна.
Тэр:
“Бид бүгд донтолтын асуудалтай тэмцэж байсан Matthew-д туслахын тулд хичээсэн. Тэр энэ өвчинтэй тэмцэхдээ маш их зовж байсан учраас бид түүнийг удаан хугацааны турш аль хэдийн гашуудаж байгаа мэт мэдрэмж төрдөг байсан. Одоо тэр өвдөлтөөсөө ангижирсан гэж бодохоор нэг талаар тайвширдаг”
хэмээн хэлж байжээ.
Matthew Perry-ийн нас баралт “Friends”-ийн жүжигчид болон олон сая үзэгчдэд томоохон гарз болсон хэвээр байна. Харин шинэ баримтат кино түүний амьдрал, ойрын хүмүүсийн дурсамж, хаалттай оршуулгын үеийн өмнө нь дэлгэгдээгүй түүхийг үзэгчдэд хүргэхээр болжээ.
