Хан-Уул дүүргийн 11 дүгээр хороо, уулын замын дагуу нийслэлийн төсвийн хөрөнгөөр барьж буй явган хүний болон дугуйн замын ажлын явцын талаар шинэ мэдээлэл гарлаа.
Нийт 1.5 км урттай уг замыг энэ онд багтаан ашиглалтад оруулахаар төлөвлөсөн бөгөөд төсөвт өртөг нь ₮3.9 тэрбум байна. Одоогоор нийт замын 560 метр хэсгийн хучилтын ажил дуусжээ.
Нийслэлийн Замын Хөгжлийн Газраас төслийн талаар:
“Уулын зам дагуух явган хүний болон дугуйн замын урт 1.5 км, зорчих хэсгийн өргөн 3.5м, авто зам болон явган хүний замын эгнээг тусгаарлах тоног хайс, иж бүрэн гэрэлтүүлэгтэй хийгдэхээр төлөвлөгдсөн.
Тендерт “ЗГБ холдинг” ХХК шалгарч, гэрээ байгуулан далан, суурь байгуулах, явган хүний болон дугуйн замын хашлага суурилуулах, гэрэлтүүлгийн суурь цутгах, цахилгааны кабель татах, туузан хайс суурилуулах, хана цутгах ажлуудыг гүйцэтгэж байгаа юм.
Өнөөдрийн байдлаар 560 метр замын хучилтын ажлыг дуусгаад байна”
хэмээн мэдээлжээ.
Замыг гэрэлтүүлэг, тусгаарлах хайстайгаар шийднэ
Төслийн хүрээнд зөвхөн явган болон дугуйн зам тавихаас гадна авто замтай давхцах хөдөлгөөнийг аюулгүй болгох зорилгоор тусгаарлах хайс, гэрэлтүүлгийн иж бүрэн шийдэл төлөвлөсөн байна.
Мөн замын далан, суурь, хашлага, гэрэлтүүлгийн суурь, цахилгааны кабель, туузан хайс болон хана цутгах зэрэг дагалдах ажлуудыг зэрэгцүүлэн хийж байгаа аж.
Уулын замын дагуу баригдаж буй 1.5 км явган хүний болон дугуйн замыг 2026 онд багтаан бүрэн дуусгахаар төлөвлөсөн бөгөөд нийслэлийн төсвөөс нийт ₮3.9 тэрбум зарцуулахаар баталжээ.
Одоогийн байдлаар хучилтын ажил нийт уртынхаа ойролцоогоор гуравны нэгээс илүү хэсэгт хүрсэн байна.
