ОХУ-ын Чита хотод үргэлжилж буй олон улсын хүүхдийн спортын XII наадам өндөрлөхөд хоёрхон хоног үлдээд байна. Тэмцээний шийдвэрлэх өдрүүдэд Монголын баг тамирчид амжилтаа ахиулж, волейболын хөвгүүд алтан медаль хүртжээ.
Ж.Магнайбаяр дасгалжуулагчтай Монголын хөвгүүдийн шигшээ баг өчигдөр аваргын төлөөх тоглолтуудаа амжилттай өндөрлүүлж, тэргүүн байрт шалгарсан байна.
Өрсөлдөгчдөө дараалан 3:0-ээр буулган авчээ
Монголын баг аваргын замдаа өрсөлдөгчдөө нэг ч сет алдалгүй ялсан нь онцлох үзүүлэлт болов.
Тэд:
- ОХУ-ын Буриадын багийг 3:0
- Өвөр Байгалын багийг 3:0
- БНХАУ-ын шигшээ багийг 3:0
харьцаагаар тус тус буулган авч, итгэл төгс алтан медаль хүртжээ.
Ийнхүү Монголын хөвгүүд тэмцээний волейболын төрөлд түрүүлж, төрийн дууллаа эгшиглүүлсэн байна.
Алтан медаль хүртсэн багийн бүрэлдэхүүн
Монголын шигшээ багт Н.Түвшинбаяр, Э.Гүнчин, Б.Эрболд, Э.Мөнх-Эрдэнэ, Г.Буяндэлгэр, О.Өсөх-Ирээдүй, Э.Санжайсрай, М.Батболд, О.Энхсүлд, А.Мөнхбаяр нар багтжээ.
Харин өнөөдөр охидын волейболын баг мөнгөн медалийн төлөө тоглохоор байна.
Шатарчид мөн багийн мөнгөн медаль хүртэв
Монголын тамирчдын амжилт зөвхөн волейболоор хязгаарлагдсангүй.
Спортын мастер Ө.Бат-Очирын удирдлагад оролцсон Б.Сэргэлэн, Б.Цолмон, Д.Цэлмүүн нарын бүрэлдэхүүнтэй шатрын баг таван хожил, нэг хожигдолтойгоор тэмцээнийг дуусгаж, дэд байрт шалгарсан байна.
Мөн хувийн ширээний дүнгээр:
- Б.Цолмон хоёрдугаар ширээнд алтан медаль
- Б.Сэргэлэн нэгдүгээр ширээнд мөнгөн медаль
- Д.Цэлмүүн гуравдугаар ширээнд мөнгөн медаль
хүртжээ.
Ийнхүү Чита хотод болж буй хүүхдийн спортын XII наадамд Монголын волейболчид алтан медалийн буухиаг үргэлжлүүлж, шатарчид ч амжилттай тоглон мөнгөн медаль нэмлээ.
