Нислэгийн тийзний үнэ огцом нэмэгдсэн үзэгдэл ойрын хугацаанд намжихгүй бөгөөд намар хүртэл өндөр хэвээр хадгалагдах төлөвтэй байна. Alton Aviation Consultancy-ийн судалгаагаар энэхүү өсөлт нь геополитикийн мөргөлдөөнөөс үүдэлтэй саатал, тасалдлуудтай холбоотой бөгөөд Арабын булангийн бүс дэх агаарын тээврийн урсгалд хүчтэй нөлөөлж байгаа аж.
Ази–Европ чиглэлд үнийн өсөлт эрчимжив
Онлайн аяллын агентлагуудын мэдээлэлд тулгуурласан судалгаанаас үзэхэд Ази-Номхон далайн бүс болон Европын хоорондох хамгийн эрэлттэй долоон чиглэлийн зургаадугаар сарын дундаж үнэ өмнөх оны мөн үеэс ойролцоогоор 70 хувиар өссөн байна.
- Сидней–Лондон чиглэлд тийзний үнэ 1500 ам.доллароос давж, бараг хоёр дахин нэмэгдсэн
- Шууд болон дамжин нислэгүүд бүгд өсөлтөд хамрагдсан
- Аравдугаар сар хүртэл үнэ дунджаар 30%-иар өндөр хэвээр байх төлөвтэй
Мөн Европоос Ази руу чиглэсэн нислэгүүдэд ч ижил дарамт ажиглагдаж байна. Зургаадугаар сарын үзүүлэлтээр:
- Үнийн өсөлт 79%-д хүрсэн
- Зарим холын зайн нислэгүүдийн үнэ бараг гурав дахин нэмэгдсэн
Үүнд дараах хүчин зүйлс голлон нөлөөлжээ:
- Агаарын орон зай хаагдсан байдал
- Булангийн бүсийн нисэх буудлуудын ачаалал
- Шатахууны үнийн өсөлт
Эрэлт буурч эхэлжээ
Өндөр үнэ болон тодорхойгүй байдлын улмаас зорчигчдын эрэлт буурч эхэлсэн байна. Cirium-ийн мэдээллээр:
- Европоос АНУ руу зуны захиалга 15%-иар буурсан
- АНУ-аас Европ руу 11%-иар буурсан
- Азиас Европ руу 4.4%-иар буурсан
Alton Aviation Consultancy-ийн гүйцэтгэх захирал Браин Терри “Мөргөлдөөн ойрын хугацаанд дууссан ч тийзний үнийн дарамт үргэлжилнэ” гэж мэдэгджээ. Мөн тэрээр “Үнийн бууралт шатахууны нийлүүлэлтийн сүлжээгээр дамжин нөлөөлөхөд гурван сар хүртэл хугацаа шаардагдаж магадгүй” хэмээн онцолсон. Түүнчлэн “Бидний харж байгаа зүйл бол түр зуурын үнийн шок биш. Шууд нөлөөлөл намдсан ч урт маршрут, хязгаарлагдмал хүчин чадал, өндөр шатахууны үнэ зэрэг нь үнийг урт хугацаанд өсгөсөн хэвээр байлгана” гэжээ.
Зарим чиглэлд үнэ хэд дахин өсөв
Ази–Европын хоорондох нислэгүүд хамгийн их дарамтад орсон бөгөөд ихэнх нь Ойрх Дорнодын томоохон зангилаа нисэх буудлуудаар дамжин өнгөрдөг. Roland Berger компанийн мэдээлснээр энэ коридор нь хоёр тивийн хоорондох нийт нислэгийн урсгалын гуравны нэгийг бүрдүүлдэг байна.
Зарим чиглэлд үнийн өсөлт онцгой өндөр байв:
- Хонг Конг – Лондон (Хитроу): 3,318 ам.доллар (560% өссөн)
- Бангкок – Франкфурт: 2,870 ам.доллар (505% өссөн)
- Сидней – Лондон (“Kangaroo Route”): 429% өссөн
Эдгээр саатал, хүчин чадлын хязгаарлалт нь нислэгийн тийзний үнийг ойрын саруудад өндөр түвшинд хадгалах гол шалтгаан болж байна.
