Калифорнийн эргээс 30 гаруй километрийн зайд далайд хөвж байсан эрийг загасчилж явсан хоёр хүн олж аварсан байна. Тэрээр өөрийгөө 14 давхар «Ovation of the Seas» аяллын хөлөг онгоцны төгөлдөр хуурч гэж танилцуулжээ.
Нэрийг нь одоогоор мэдээлээгүй уг эрийг эмнэлэгт хүргэсэн бөгөөд биеийн байдал нь тогтвортой байгааг АНУ-ын Эргийн хамгаалалтын алба мэдэгдсэн байна. Тус байгууллага болсон явдлын нөхцөл байдлыг шалгаж эхэлжээ.
«Өөрийгөө үхэх нь л гэж бодлоо»
Загасчид түүнийг уснаас гаргасны дараа тэрээр «Баярлалаа, би өөрийгөө үхэх нь л гэж бодлоо» хэмээн хэлсэн байна.
Албаныхны урьдчилсан таамгаар, уг эр шөнийн 02:30 цагийн орчимд хөлөг онгоцноос унасан байж болзошгүй аж. Энэ тооцоогоор тэрээр аврагдах хүртлээ Номхон далайд ойролцоогоор есөн цаг байсан болж байна.
Далайн усны дулаан амьд үлдэхэд нь нөлөөлсөн гэж үзжээ
Түүнийг олсон загасчдын үзэж байгаагаар, далайн ус ердийнхөөс дулаан байсан нь амьд үлдэхэд нь тусалсан байж болох аж. Тухайн орчмын усны температур Цельсийн 24 хэм орчим байжээ.
Энэ дулаарлыг 2026 онд эрчимжиж буй Эль Нино үзэгдэлтэй холбон тайлбарласан байна. Номхон далайн нөхцөл байдлыг ажиглаж буй эрдэмтдийн мэдээлснээр, уг үзэгдлийн нөлөөгөөр усны температур дунджаас 3.05 хэмээр нэмэгджээ.
Загасчид ус илүү хүйтэн байсан бол ийм удаан хугацаанд амьд үлдэхэд хавьгүй хүндрэлтэй байх байсан гэж үзсэн байна. Харин эр хөлөг онгоцноос хэрхэн унасан болон усанд яг хэдий хугацаанд байсныг шалгалтаар тодруулах юм.
Эх сурвалж: BBC
