2026 оны нэгдүгээр сарын 20-ны Мягмар гарагт эрчим хүчний чадлын дутагдлаас шалтгаалан Улаанбаатар хотод цахилгаан эрчим хүчийг хэсэгчлэн хязгаарлах боломжтой байршлуудын урьдчилсан хуваарийг “Улаанбаатар цахилгаан түгээх сүлжээ” ТӨХК өнөөдөр 13:20 цагт танилцууллаа.
Эрчим хүчний системийн аюулгүй байдалтай холбоотой анхааруулга
Компаниас мэдээлэхдээ, эрчим хүчний системийн тасралтгүй, найдвартай ажиллагааг хангахын тулд иргэд, аж ахуйн нэгжүүдийг зайлшгүй шаардлагатай бус цахилгаан хэрэгслээ тодорхой цагуудад унтрааж, ачааллаа зохистой түвшинд барихыг уриалжээ.
Цахилгаан эрчим хүчний хэрэглээ оргил үедээ хэт ачаалалтай болж, системийн горим алдагдах эрсдэлтэй байгаа тул урьдчилан сэргийлэх арга хэмжээний хүрээнд ийм төрлийн хуваарь, “болзошгүй” хязгаарлалтын мэдээллийг гаргаж байгаа гэж тайлбарласан байна.
Хязгаарлалтын шийдвэр хэрхэн гарч, хаанаас мэдээлэх вэ
Цахилгаан эрчим хүчний бодит хязгаарлалт хийх эсэх, ямар хүрээнд хэрэгжүүлэхийг “Диспетчерийн үндэсний төв” ТӨХК-ийн шийдвэрээр тогтооно. Өөрөөр хэлбэл, танилцуулсан байршлууд нь урьдчилсан “болзошгүй” хуваарь бөгөөд эцсийн хязгаарлалт нь горимын бодит нөхцөлөөс хамаарна.
Хязгаарлалт хийх тухай шийдвэр гарсан нөхцөлд нийслэлийн Шуурхай удирдлага, зохицуулалтын төв болон “УБЦТС” ТӨХК-ийн албан ёсны сошиал сувгууд, цахим нүүр хуудсаар дамжуулан олон нийтэд мэдээлэл хүргэхийг компанийн зүгээс мэдэгдэв.
Мөн хязгаарлалт хийхээр төлөвлөсөн хэрэглэгчдэд гэрийн бүртгэлтэй гар утасны дугаараар нь мессежээр урьдчилсан мэдээлэл илгээж ажиллаж байгааг онцолсон байна.
