“Star Dance Mongolia” клубын “Star Queen”, “Star Girls”, “Star Erdenes” багууд Хореографик латин бүжгийн Монгол Улсын аварга шалгаруулах тэмцээнд амжилттай оролцож, Испанид болох дэлхийн аваргад өрсөлдөх эрхээ авжээ.
2026 оны аравдугаар сарын 17-нд Дэлхийн бүжгийн спортын холбооны гишүүн Монголын бүжгийн спортын холбооноос Хореографик латин бүжгийн улсын аварга шалгаруулах тэмцээнийг зохион байгуулсан байна.
Тэмцээнд “Star Dance Mongolia” клубын ахмад насны “Star Queen”, өсвөрийн “Star Girls” болон Эрдэнэт хотоос оролцсон “Star Erdenes” багууд өөрсдийн ангилалд өрсөлдөж, медаль хүртжээ.
Ахмад насны ангилалд “Star Queen” баг тэргүүн байр эзэлж, Монгол Улсын аварга болсон байна.
Харин 2025 оны дэлхийн аварга “Star Girls” баг энэ удаа ч өсвөрийн ангилалд түрүүлж, улсын аваргын цолоо дахин хамгаалжээ.
Эрдэнэт хотын “Star Erdenes” баг 14 багаас гуравдугаар байр эзэлж, хүрэл медаль хүртсэн байна.
Ингэснээр “Star Queen”, “Star Girls”, “Star Erdenes” гэсэн гурван баг 2026 оны арваннэгдүгээр сарын 28-29-нд Испанийн Гвадалажара хотод зохион байгуулагдах Хореографик бүжгийн дэлхийн аварга шалгаруулах тэмцээнд Монгол Улсаа төлөөлөн оролцох эрхтэй болжээ.
“Star Girls” дэлхийн аваргын цолоо хамгаалах дараагийн сорилтдоо орно
“Star Dance Mongolia” клубын “Star Girls” баг 2025 онд дэлхийн шилдэг есөн орны 12 багтай өрсөлдөж, Д.Батсайханы дэглэсэн “Хунт нуур” бүжгээрээ дэлхийн аварга болсон юм.
Энэ нь Монголын бүжгийн спорт төдийгүй багийн төрлүүдийн хувьд онцлох амжилтуудын нэг болсон билээ.
Тус баг энэ жил улсын аваргын цолоо дахин хамгаалснаар дэлхийн тавцанд дахин хүч үзэх эрхээ баталгаажуулжээ.
Энэ удаа “Star Dance Mongolia” клуб нэг бус, гурван багийн бүрэлдэхүүнтэйгээр Испанийг зорихоор бэлтгэлээ үргэлжлүүлж байна.
- “Star Queen” — Монгол Улсын аварга
- “Star Girls” — улсын аваргын цолоо хамгаалсан, 2025 оны дэлхийн аварга
- “Star Erdenes” — 14 багаас гуравдугаар байр, хүрэл медаль
Гурван баг зэрэг дэлхийн аваргад оролцох эрх авсан нь Монголын хореографик бүжгийн түвшин, багийн ур чадвар, олон улсын өрсөлдөх чадвар нэмэгдэж буйн нэг илэрхийлэл болж байна.
Одоо тамирчид, дасгалжуулагчид, багш нар болон эцэг эхчүүд арваннэгдүгээр сарын сүүлээр болох дэлхийн аваргын тэмцээнд бэлтгэлээ эрчимжүүлж, Монгол Улсынхаа нэрийг олон улсын тайзнаа өндөрт гаргах зорилго тавин ажиллаж байна.
