Соёлын яамны алдаа хиймэл оюун ухааны хэрэглээний эрсдэлийг харуулав
Төрийн бүх шатны байгууллагууд хиймэл оюун ухаан, тэр дундаа ChatGPT зэрэг хэрэгслийг албан бичиг, албан ёсны мэдээлэл, орчуулгад шууд ашиглахдаа хатуу хяналттай байх шаардлагатайг Соёлын яамтай холбоотой саяхны алдаа дахин санууллаа.
Сүүлийн үед гар утастай, интернэт ашигладаг бараг хүн бүр ChatGPT-ээс асууж, текст бичүүлж, орчуулуулж, санаа авч ашиглах болсон. Дэлхий нийт хиймэл оюун ухааны эринд шилжиж, олон төрлийн ажлыг AI гүйцэтгэх боломжтой болсон ч төрийн албан ёсны орчуулга, бичиг хэрэг, олон нийтэд хүргэх мэдээлэлд ийм хэрэгслийг шууд хуулж ашиглах нь эрсдэлтэй юм.
AI-аас санаа авах, анхны хувилбар боловсруулах, орчуулгын тусламж авах боломжтой. Гэхдээ үүний дараа заавал хүн хянах, засах, нягтлах, мэргэжлийн түвшинд дахин боловсруулах шаардлагатай.
ChatGPT гэж юу вэ
ChatGPT нь OpenAI компанийн 2022 оны арваннэгдүгээр сард танилцуулсан хиймэл оюун ухаанд суурилсан чатбот юм. Энэ нь Generative Pre-trained Transformer буюу GPT технологид тулгуурлан хүний хэлээр харилцах, асуултад хариулах, текст бичих, код боловсруулах, орчуулах зэрэг олон үйлдэл хийдэг.
Өдгөө дэлхий даяар олон сая хүн уг үйлчилгээг өдөр тутмын ажил, суралцах үйл явц, бичвэр боловсруулахад ашиглаж байна. Үнэгүй болон төлбөртэй хувилбаруудтай бөгөөд сүүлийн үеийн загварууд илүү нарийвчлалтай ажиллах боломжтой.
Гэхдээ энэ нь алдаагүй гэсэн үг биш. ChatGPT буруу мэдээлэл өгөх, утга гажуудуулах, албан хэл найруулгад тохирохгүй өгүүлбэр үүсгэх, эх сурвалжгүй дүгнэлт гаргах эрсдэлтэй.
Төрийн байгууллага AI-г шууд бус, хяналттай ашиглах ёстой
Монгол Улсад залуу үеийнхэн төр, хувийн хэвшлийн ажлын талбарт идэвхтэй орж ирсэн. Тэд технологи ашиглахдаа хурдан, дасан зохицох чадвартай. Энэ утгаараа хиймэл оюун ухааныг өдөр тутмын ажилд ашиглах нь зайлшгүй чиг хандлага болж байна.
Гэхдээ төрийн албан хэрэг, сайдын мэдэгдэл, яамдын албан мэдээлэл, бодлогын баримт бичиг, олон нийтэд хүргэх шийдвэр зэрэгт AI-аар боловсруулсан материалыг шууд нийтлэх нь ноцтой асуудал үүсгэж болзошгүй.
Төр ухаалаг, цахим, шуурхай байх ёстой. Гэхдээ энэ нь албан ёсны мэдээллээ хиймэл оюун ухаанаар шууд бичүүлээд, хяналтгүй нийтэлнэ гэсэн үг биш юм.
Албан мэдээллийн алдаа төрд итгэх итгэлд нөлөөлнө
Төрөөс гарч буй мэдээлэл олон нийтэд тодорхой, ойлгомжтой, алдаагүй хүрэх ёстой. Ялангуяа албан тушаалтны мэдэгдэл, яамны байр суурь, төрийн шийдвэр зэрэг нь зөвхөн нэг байгууллагын нэр хүндийн асуудал биш, төрд итгэх иргэдийн итгэлтэй шууд холбоотой.
Боловсруулаагүй, буруу, орчуулгын алдаатай, хиймэл найруулгатай мэдээлэл олон нийтэд хүрвэл төөрөгдөл үүсгэж, байгууллагын хариуцлага, мэргэжлийн түвшинд эргэлзээ төрүүлнэ.
Соёлын яамтай холбоотой алдаа нь төрийн бүх шатанд AI хэрэгслийг хэрхэн ашиглах, ямар үед хориглох, ямар шатанд хүний хяналт заавал оруулах талаар тодорхой журам хэрэгтэйг харуулж байна.
AI-г хориглох бус, хяналттай журамлах шаардлагатай
ChatGPT болон бусад AI хэрэгслийг бүрэн үгүйсгэх боломжгүй. Харин төрийн байгууллагууд дараах зарчмыг мөрдөх шаардлагатай байна.
AI-аар боловсруулсан аливаа албан бичиг, орчуулга, мэдэгдлийг хүний хяналтгүйгээр нийтлэхгүй байх. Мэргэжлийн орчуулагч, редактор, эрх бүхий албан тушаалтан заавал шалгах. Албан ёсны мэдээлэлд ашигласан бол эх сурвалж, утга, хууль эрх зүйн нийцлийг нягтлах. Төрийн нууц, хувийн мэдээлэл, дотоод баримт бичгийг гаднын AI системд оруулахгүй байх.
Ингэж чадвал хиймэл оюун ухаан төрийн ажлыг хөнгөвчлөх хэрэгсэл болж чадна. Харин хяналтгүй ашиглавал алдаа, төөрөгдөл, хариуцлагын асуудал үүсгэх эрсдэлтэй.
